Trahedya sa Pasko

Dili ti-aw ang kasubo nga gibati sa labing minus duha ka mga pamilya nga nawagtangan sa ilang minahal sa kinabuhi sa buwag nga mga hitabo panahon sa Pasko. Ang usa apil sa mga naugdaw sa sunog nga milamoy sa kapin sa 400 ka mga panimalay didto sa Barangay Duljo-Fatima, Cebu City.

Samtang ang laing usa biktima sa linuog nga krimin didto sa dakbayan sa Carcar.

Si Cyrus John Ferras natanggong sa giduwaan niini nga internet café dihang miulbo ang sunog niadtong kadlawon sa Pasko.

Ang paig niyang lawas mao nalay nahipos sa iyang mga ginikanan human sa dakong sunog.

Pait ang mawagtangan og panimay labi pa atol sa Pasko nga panahon unta sa pagmaya ug hudyaka uban sa pamilya.

Apan doble ang sakit nga gihambin sa pamilya ni Ferras tungod kay gawas nga naugdaw ang ilang pinuy-anan nahanaw pa gyud ang usa ka membro sa pamilya.

Ang maong sakit nga hitabo tingali nakapukaw sab sa mga ginikanan nga di maayong pasagdan ang atong mga anak gawas sa panimay.

Nganong didto pa man sa internet café ang 12 anyos nga biktima panahon sa kadlawon? Unsay nahitabo sa lagda sa dakbayan nga nagdili sa mga minor de edad pagsulod sa internet café?

 Kapin sab sa 2,000 ka mga tawo ang misugat sa Pasko nga wa nay pinuy-anan. Walay kahigdaan ug walay pagkaon.

Nagkaboang ang mga opisyal sa dakbayan sa Sugbo unsaon pagpakaon ang mga biktima sa sunog niadtong Pasko tungod kay way maka-supply og pagkaon.

Nakabasa ko sa panawagan ni Konsehal Dave Tumulak diha sa Facebook samtang didto ko sa probinsiya, akong naaninaw ang nagbuntaog nilang suliran unsaon pagpakaon ang mga biktima.

Hinaut dunay leksiyon nga nakuha ang mga opisyal sa dakbayan sa hitabo. Kinahanglang dunay andam sa mga ingon niini nga okasyon.

* * *

Nagbangutan sab ang pamilya sa usa ka dalagita human kini gilugos ug gipatay niadtong adlaw sa Pasko. Ang iyang patay’ng lawas napalgan nga gilabay didto sa si-ot nga dapit sa Barangay Guadalupe, Carcar City.

Ang dalagita, giingong lumad nga taga lungsod sa Barili, nakit-an nga hubo ug wala nay kinabuhi.

Pastilan, pagkalampingasan sa mga responsabli sa maong krimin. Hinaot nga madakpan sa kapolisan sa labing dali nga panahon ang responsabli niini.