EDITORYAL - Problema sa bullying

Seryoso ug dili tiaw ang epekto sa bullying diha sa mga tunghaan. Sakit kaayo kini ug may negatibong epekto sa mga biktima mao nga dili kini angay nga himuong kataw-anan ug pasagdan.

Subo kaayong pamalandungon nga anha pirme mahitabo sa mga high schools nga diin nagsugod pa og kahingkod ang mga hunahuna sa mga kabataan.

Sagad sa mga biktima dili motug-an sa ilang mga ginikanan tungod kay mahadlok makasab-an.

Ang RA 10627 o Anti-Bullying Act of 2013 ug ang Child Protection Policy nagmando sa mga institusyon sama sa mga eskuylahan nga kinahanglang proteksyonan ang mga bata gikan sa mga bullies.

Sa nahitabo sa Ateneo de Manila, nag-viral kini sa social media diin nakita ang usa ka 15 anyos nga tinun-an nga nikulata sa iyang kaubang estudyante sud sa pansayan.

Apan dili lang diay kadto ang insidente nga diin ang maong ‘bully’ nangulata og kaubang estudyante, aduna pay daghang naunang hitabo apan wala aksyoni sa eskuylahan.

Gibasol ang eskuylahan kun nganong wala sila moaksyon nga mahunong kining binuhatan sa maong estudyante nga kanunay naman diay niya kining gibuhat.

Anak siya og prominenteng pamilya nga adunahan, black belter kini ug ang iyang maguwang sa Taekwondo ug may mga post kini sa social media nga nangayo og pasaylo apan dalang panaway sa iyang mga kritiko.

Kun basehan ang gidaghanon sa mga videos nga siya nangulata’g kaubang mga estudyante lisod tuohan nga siya biktima usab kaniadto og bullying.

Posibleng iyaha na gyud kining kinaiya ug naanad siyang maoy manghawod ug bahala na’g unsay ikasulti sa uban. Kaning klaseha sa kinaiya namatikdan na unta sa mga ginikanan kun nagtutok sila sa disiplina sa ilang mga anak.

Kinahanglang panid-an kun di ba sila manakit o sila bay pasakitan sa mga kaduwa aron sa ingon masolusyonan dayon.