Catriona, Christmas gift sa Pilipinas

Naa ko sa trabahoan dihang gipahigayon ang pinaling pasundayag sa kinsay mapiling Miss Universe 2018 nga giapilan og 94 ka hinashasang guwapa sa nagkalainlaing nasod. Sanglit dili man nako kinaiya ang pagbiya sa akong area of responsibility oras sa trabaho, nagpangutana lang ko sa mga kauban, kinsa gikan sa canteen.

“Sulod sa top ten, Boss, si Catriona Gray!” Madasigong tug-an sa bag-o lang miabot. Unya paglabay sa pipila ka gutlo, adunay laing misulod-nagpahibalo: “Apil ta sa napiling top 5, Boss!”

Haskang dalia nakong nakasukna: “Unya, unsay gipangutanang Steve Harvey ug giunsa pagtubag ni Catriona?”

“Bahin sa marijuana, Boss. Unsa kunoy iyahang stand kon ang marijuana himoong legal? Ug ang tubag sa atong pambato.:”

“I’m for it being used for medical use, but not so for recreational use. Because I think, if people will argue, then what about alcohol and cigarettes? Everything is good but in moderation.”  “Giingon ana niya, Boss!”

“Mao ba? Ay, dako kaayog purohang modaog!” Sumpay nako.  Ngano?

Tungod kay very short, clear and concise with a heart ang iyang tubag. Very neutral. Wala magpakitag pagsaway.

Hinunoa, mipasabot nga ning kalibotan dili tanang  butang sama sa marijuana, ilimnong makahubog o sigarilyo makadaot. Kana kon gamiton lang sa hustong paagi. Ug dili pasobrahan. 

Kay tan-awa ra god nang balloon nga masobrahag kargag hangin?  Imbes makalupad sa itaas, mibuto hinuon. Ug wala mapusli ang katahom sa iyang pagsaka ngadto sa kinatas-ang bahin sa kapanganoran. Sama sa kinabuhi sa tawo. Kon dili mag-amping sa hustong sukod sa mga butang nga gikinahanglan sa lawas ug kalag, matakpan gyod sa kangitngit ang kahayag sa iyang kaugmaon.

Ingon niini kabug-at ang nakab-ot kong interpretasiyon sa gitubag ni Catriona ngadto sa first round nilang Q & A. Ug nagulat na lang ko dihang pagkataudtaod, higala kong manedyer, miduol nako ug mipahibalo: “Pare, panalo ang Pilipinas. Catriona Gray is crowned New Miss Universe 2018.”

Misayawsayaw sa tumang kalipay ang mga asul, puti ug pulang dayandayan sa simpleng Christmas tree sa among trabahoan, samtang sa akong kahiladman nabati ko ang hunghong sa akong kasingkasing: “Pagkatahom sa Christmas gift nga gihatag sa atong  Ginoo sa Pilipinas niining paskoha!