Binibining Marijuana

Nadakpan sa gipahigayon nga buy bust operation sa kapolisan sa dalan Escario, Barangay Kamputhaw niadtong Sabado sa kaadlawon, Disyembre 15, 2018 ang 22 anyos nga si Teri Marina Colmenares, kandidata sa bag-o lang nahuman nga Binibining Cebu 2018.

Si Colmenares ang nagrepresentar sa nahisgotan nga indigay sa kaanyag sa lungsod sa Carmen lalawigan sa Sugbo. Kauban ni Colmenares nga nadakpan mao si Nicole Allan Casino.

Nakuha kang Colmenares ang siyam ka putos sa taas nga kalidad sa Marijuana. Samtang nakuha usab kang Casino ang mga party drugs.

Si Colmenares nga nagdumili sa pagtug-an kinsa ang nag-supply kaniya sa Marijuana gipasakaan na og kasong kalapasan sa R.A No. 9165 o Comprehensive Dangerous Act of 2002 human nila makuha ang Chemistry report sa Philippine Drug Enforcement Agency 7. Ang nagbaligya og drugas ubos sa balaud dili puyde nga makapiyansa.

Ang hepe sa kapolisan sa Guadalupe Police Station 9, Dexter Basirgo mitug-an nga sa ilang imbestigasyon, wala gayud mosulti si Colmenares diin niya makuha ang Marijuana. Sa iyang pagpaniid, nahadlok ang beauty queen.   

Si Colmenares nadakpan human mitumaw ang iyang pangalan sa gihimong imbestigasyon sa kapolisan kang Nicole Allan Casino. Si Casino mitug-an nga si Teri Marina Colmenares ang iyang tinubdan sa ginadiling drugas.

Si Casino gipangita sa kapolisan human siya gitug-an sa usa ka Disc Jockey nga maoy iyang tinubdan sa ginadili nga drugas. Ang Disc Jockey nadakpan niadtong Disyembre 8 tungod sa paghupot og ginadiling drugas.

Tungod kay nadakpan ug natanggong na karon sa prisohan sa sulod na sa prisohan ipaso-paso ni Teri Marina Colmenares ang iyang kaanyag.

Pagkasayang sa iyang hayag nga ugma. Siguro may dako pa unta siya nga kahigayonan nga makarepresentar sa nasud sa indigay sa kaanyag sa kalibotan apan iya kining gibaliwala ug maoy gipili ang init ug ngitngit nga kalibotan.

Pag ayo-ayo na lang inday sa alimuot nga prisohan.