Kandidatong mangharas, dakpong Duterte

Kapila na mahitabo nga ang kandidatong maoy gibotohan sa kinabag-an sa piniliay, inig human sa iniphanay, mao hinuoy mapilde?

Panahon lang niadtong midagan si anhing Senadora Miriam Defensor pagka presidente sa Pilipinas batok ni Fidel P. Ramos, base sa advanced survey nga gipahigayon sa mga unibersidad, siyudad ug munisipalidad, naglawig na daan ang kadaogan ni Miriam.

Tiaw bay, halos tanang estudyante sa kolehiyo nga gibisita ni Miriam ug mga lumolupyo sa  kabaryohan, kalungsoran ug siyudad nga iyang gipangampanyahan, nahapasaludo sa kalantip sa iyang utok?

Pero, naunsa ba, nga si Ramos man hinuoy midaog? Haskang hisagmuyoa sa minilyong dumadapig ni Miriam

Unya, ilang gilingi mga adlaw sa pagpangampanya lakip na sa yugto sa piniliay.

Nahinumdom sila nga adunay vote-buying nga mikatap. May mga dapit nga gipakatapan og mga sundalo ug goons nga iyaha sa mga mikandidatong politiko.

Unya, gawas sa pagpangharas sa mga goons, may nabalitaan pa gyong ballot-switching.

Busa, igo na lang intawon sa pagpanghupaw ang mga pobreng botante nga nahiagom sa kanhi naandang dili patas nga piniliay.

Sa laktod, ang milingkod sa trono dili ang tinuorayng kandidato nga maoy gipili sa ilang kasingkasing.

Praktis nga sukad pa sa pagpamunoan ni anhing Ferdinand E. Marcos hangtod na sa kang PNoy nagpadayon.

Makauulawng pamaagi nga gustong putlon ni Pres. Rodrigo Roa Duterte aron ang makalingkod sa trono mao na gyod ang tinuoray’ng gipili sa kinabag—an. Busa giwarningan niya ang mga military ug kapolisan niadtong iyang pagpakigpulong sa usa ka kalihokan sa Bulacan sa miaging Disyembre 10 ning mosunod:

“Kahit kasama kita sa gobiyerno, o kasama kita sa partido, o kalaban sa politika, do not terrorize, do not intimidate, do not create fear to voters. Kapag ginawa ninyo yan, ako mismo ang pupunta doon. At ako mismo ang aaresto sa iyo!

Do not take sides, either for or against my party, huwag kayong makialam. Huwag kayong magkampanya and do not favor any candidate. That is the mandate of our Constitution and we will stick by it.”

Pagkanindot kon matuman. Kay first time in history, makatilaw na gyod og fair and honest election ang Pilipinas. Basta, Tatay Digong, dakpa gyod ang mang-harass, ha?