Pasko, tiyempo sa pagpanghatag

Dinhi sa ato, kun kinsa ‘toy hayahay og trabaho maoy dako’g suweldo.

Kun manager ka sa banko o dagkong kompaniya, magobiyerno man o mapribado, ang imong opisina  de-aircon pa gyud.  

Pero’g imong pangita, usa ka construction worker lang, gawas nga bug-at kaayo ang sako sa semento, balas, graba nga alsahon ug masahon, ang suhol gamay ra intawon.

Arang-arang ang mga diyanitor nga naasayn sa mga datong kompaniya kay bisa’g minimum ray suweldo, sa ilang pagpanilhig ug pagpanglimpiyo sa kasilyas, at least, bugnaw ang lugar nga ilang gialagaran. Kay may aircon man.

Kini silang matanga sa mga mamumuo ang  mangalipay kun maghinangat na ang adlaw sa Pasko. Kay kini rang higayona nga makapamarayeg sila’g pinaskohan sa mga taga opisina, kinsa pulos dako’g suweldo.

Kusog man gud ning taga opisina manugo nila, mao nga giparaygan nila’g diyutay’ng voluntary contribution para sa ilang simpleng Christmas Party.

Haskang luoya! Wala gyuy nanghatag. Sanglit sa ilang tan-aw, mga diyanitor ra man. Pero’g manedyer pa to, ay sus, no question asked.

Dugo dayon! Kay may giapas man nga bawos.

Ang Pasko tiyempo sa pagpanghatag, diin ang maayong hatagan kadtong mga timawa nga dili makabawos.

May bata nga kuyog sa iyang construction worker nga Tatay, gustong ipapalit ang lamiang cake nga naibgan sulod sa estante sa usa ka mall  nga sukad masukad wa pa gyud niya matilawi.

Apan mipasabot ang amahan nga wala siyay igong kantidad nga ikaabot sa presyo.

Busa, nasubo ang bata ug igo na lang mipatulo sa luha samtang nagsud-ong sa cake.

May desenteng lalaki sa ilang tupad nga nangutana sa tindera kun tagpila ang maong cake ug dihang miingon ang naulahi nga tag P1K, gibayaran dayon sa desente dungan ang pag-ingon: “Pusta, Miss, ug ihatag sa bata.”

Puwerteng pahiyom sa estatuwang Santa Claus nga nagbarog sa duol.

Ug wala kalikayi ang pagtulo sa mga luha sa aircon nga nakasaksi ug natandog sa talagsaong gibuhat sa desente. Kay sa makausa pa, daw iyang gipadayag ang tinuoray’ng kahulogan sa diwa sa Pasko nga mao —  ang pagpanghatag gyud og makalipay’ng pinaskohan ngadto sa wala.

Mga suki namong Banat News readers, kaya ba nato sundon ang iyang gihimo?