Paghungaw sa mga baho sa budget
Kun wa pa magtinulisokay ang Malakanyang ug ang Kongreso, di unta mahibaw-an sa mga magbubuhis ang gidudahan nga mga binuang sa nasudnong budget alang sa sunod tuig. Ang pabilo sa pagsilaob sa kontrobersiya mao si Senador Panfilo Lacson.
Nga mahimo ra gyud untang bungulbungolan. Sama nga wa siya tagda sa mga kongresista sa samang expose atol sa pagtuki sa nasudnong budget sa nangaging katuigan. Salamat nga sa kataposan nadutlan ang bag-ong liderato sa House of Representatives nga niambit pa gyud ang Palasyo, wa dayon mamatay ang dugay nang gibalikbalik nga isyu.
* * *
Di na bag-o ang pasangil ni Lacson nga sama ni anhing Senador Joker Arroyo wa magpatintal sa pagpahimus sa makabuhong uyamot nga pork barrel.
Matud niya bisan sa pagdili sa Korte Suprema gisukip sa mga kongresista ang gahin sa ilang mga proyekto human nasumiter sa Malakanyang ang budget ngadto sa House.
Mahilom na unta si Lacson tungod sa naandan nga pagpanghimakak sa mga kongresista. Apan mas nidako ang isyu kay nidason ang palasyo sa awhag nga ipatin-aw nilang House Speaker Gloria Macapagal Arroyo ang mas dagkong gahin sa ilang mga distrito.
* * *
Nakapasamot sa kasapot sa mga kongresista ang paapas ni Budget Secretary Benjamin Diokno: Ang House maoy mabasol kun dul-an sa tunga sa milyon ka Pilipinhon ang mahitumpawak sa katimawa tungod sa reenacted budget sa sunod tuig.
Wa nang kaagwanta si House Majority Floorleader Rolando Andaya, di na si Lacson kondili si Diokno na maoy gipuntirya:
Nasipong na sa taphawng kompaniya ang binilyon ka pesos nga proyekto bisan wa pa maaprobahi ang 2019 budget.
* * *
Mabinantayon hinuon ang mga kongresista, giklaro nga di ang presidente kon dili ang pipila ra ka sakop sa gabinete ang ilang gipasanginlan og kahiwian.
Apan kamao sab si Diokno, nitataw nga ang tanang aspeto sa budget gipaluyohan sa presidente.
Naamgohan nga ang tinubagay sa Malakanyang ug sa House mas nipaburot pa sa iyang expose, si Senador Lacson wa na mosakgaw sa lalis.
Ug igo na lang niawhag sa bag-ong liderato sa buhatan sa Ombudsman sa paglusad og imbestigasyon unsa man gyud diay ang tinuod nga nahitabo sa nalangay ug nagkayamukat na nga 2019 budget.
* * *
- Latest
