Duterte dili modupa sa Krus

Sobra ka gamhanan ang illegal drugs syndicates nga nahimo nang sakit nga kanser sa atong nasod, diin bisa’g giunsa ni Presidente Rodrigo Roa Duterte pagpangita’g epektibong tambal aron maalim, ingon sa nagpakita nga kini wala na gyoy kaayohan.

Igo lang paminawon ang kahapdos sa iyang war on drugs, unya ang transaksiyon sa gidiling negosyo nagpabiling himsog sulod ug gawas sa prisohan – daw naghatag og mensahe,  nga wala nay chance nga mamatay sa hingpit kining maong kagaw.

Niadtong si Ronald ‘Bato’ dela Rosa pa ang Philippine National Chief, kinsa maoy gitahasan ni Duterte pagpayhag sa nakagamot nang illegal drugs dinhi sa Pilipinas, nakahilak siya sanglit maglisod pag-ila hain sa iyang mga sakop ang mga buotang karnero ug hain ang pasaway?

Pipila na ba ka libo ang naalaot nga kinabuhi sa War on Drugs? Pipila na ba ka mga polis ang nangamatay nga gipusil ra usab sa ilang kauban?

Pipila na ba ka tagtungod ang nagpaninggit og hustisya sa gitukhang nilang minahal, kinsa bisag walay dalang armas ug  gibinaklid pa gani sa paggapos, pero kusganong giinsister sa kapolisan nga ila kining gipamatay kay misukol?

Sagrado ang kinabuhi sa tawo. Kay kitang tanan binuhat sa Diyos ug giisip nga Iyahang templo. Hinungdan, nga pasipad-an gani sa tawo ang Iyang mga binuhat, moabot gyud ang panahon nga buksan Niya ang selyadong top secret nga giputos sa bakak aron makita sa kahayag ang kamatuoran.

Ug mao kini ang nahitabo niadtong tulo ka polis nga mipatay ni Kian Lloyd de los Santos, kinsa gibirahan nila kay misukol kuno, unya namatud-an sa hukmanan nga wala diay. Busa, pulos nakonbikto.

Ang maong mga polis nagmatuod nga dinha sa tibuok puwersa sa kapolisan, naa gyud diay nahatipon nga mga black sheep nga maoy nakapahilak ni kanhi PNP Chief Bato.

Dili kay black sheep lang ang kamatang sa maong mga polis. Kon dili, dakong krus sila nga wala lang makahatag og dugang kabug-at sa War on Drugs nga gipas-an ni Tatay Digong.

Nakababag pa gyod sa iyang maanindot nga tumong.

Hinungdan, nga sa nagkagot niyang mga bag-ang, si Duterte miingon, nga never, duphan niya ang maong krus!