Pagpalambo sa way paggusbat
Angay’ng paluyohan ang mga paningkamot sa kadagkoan sa Artsidyosesis sa Sugbo nga gipangulohan ni Arsobispo Jose Palma sa pagtigom og igong pundo aron ibayad sa nagbuntaog nga gastohan sa pagpatambal sa retiradong mga pari nga nataptan og seryusong mga balatian tungod sa kahuyang sa ilang panglawas ug kahinog sa pangidaron.
Angay’ng sabton ang pakigtambayayong nilang Arsobispo Palma sa pribadong mga kompaniya nga makatabang sa dako ug dinaliang panginahanglan sa pundo kay gikatahong nataligam-an ang panginahanglang medikal sa mga pari nga wa nay mga parokya sud sa daghan na uyamot nga katuigan.
* * *
Angay sab nga tugotan ang mga tagduma sa Simbahang Katoliko sa pagpangita og mga paagi sa pagpalambo sa kabtangan sa artsidyosesis nga wa kapusli, o napasagdan lang nga nabakante, ang uban gani gigamit sa katuyoan nga way labot ang simbahan, aron mapun-an ang ilang panudlanan.
Kay gawas sa gastohang medikal, may inadlaw sab nga mga gastohan ang artsidyosesis nga di mahimong ihangad lang sa langit o isalig lang sa ilang bahin sa mga kolekta atol sa mga Santos nga Misa nga gipahigayon matag adlaw sa gatosan niya ka parokya.
* * *
Apan sa pagtikad sa ilang panudlanan aron pagtagbaw sa kaliboan ug usa nila ka gastohan ug panginahanglan, hinaot nga di makalimtan nilang Arsobispo Palma ang labing yanong mga lagda nga nigiya sa mga nag-una nila sa duyan:
• Matukod ang bag-o sa way pagguba sa daan;
•Kapangandaman ang ugma sa way pagpanamastamas sa kagahapon; ug
• Sa labing tandugon nga mga bahin sa kasaysayan sa simbahan, ang katawhan maoy iyang dangpanan di kaatbang.
* * *
Sa di pa ipadayon ni Arsobispo Palma ang pagbungkag sa Patria de Cebu, mahimo bang iyang pasabton ang iyang mga parokyano:
• Kinsa may nagsulti niya nga huyang nang estruktura?;
• Kun gabok nang 64 anyos nga Patria de Cebu, nganong di man palig-unon inay nga tiwasan?;
• Kun ganahan si Arsobispo Palma nga pulihan og bag-o ang huyang nang mga estruktura, nganong wa man mobaraw sa pagpahiuli sa kampanaryo sa Basilica Minore del Sto. Nino nga nahugno sa linog niadtong 2013?; ug
• Unsaon may pagtulon-an nga makuha sa mga delegado sa National Youth Day sa Sugbo sa iyang pagpabungkag sa hinagoan sa mga tinun-an sa dekada 50?
* * *
- Latest
