EDITORYAL - Bantayan ang kasabotan

Gikatahong nagpinirmahay na og memorandum of understanding (MOU) ang Pilipinas ug ang China sa joint oil and gas development diha sa giilogang teritoryo sa West Philippine Sea, ug bisan ang kritiko batok niini nakauyon sa maong kasabotan.

Kini tungod kay ang giingong gipirmahang MOU hinimo sa Pilipinas ug dili ang hinimo gikan sa China. Matud pang Supreme Court Associate Justice Antonio Carpio sa report sa The Philippine Star, maayo kini para sa Pilipinas.

Si Carpio mao ang usa sa mga lig-on nga kritiko ni Pres. Duterte pag-abot sa hisgotanan sa mga teritoryo sa Pilipinas diha sa WPS.

Tungod kay siya maoy nangatubang didto sa international community aron makakuha og suporta ug simpatiya ang Pilipinas batok sa pagpangilog sa China sa mga teritoryo niini sa WPS nga niresulta sa paborableng desisyon sa Permanent Court of Arbitration (PCA) niadtong 2012 nga diin pabor sa nasud.

Pinaagi sa maong MOU nga gipreparar sa Pilipinas ug gipirmahan usab sa China, dili na “joint-exploration and exploitation” ang papel sa China. Mamahimo lamang silang sub-contractor sa maong proyekto.

Una niini, gusto sa China nga “joint-exploration and exploitation” ang mahitabo, apan si bisan kinsa pang presidente sa Pilipinas kun motugot niini, makonsiderar nga nakasala sa mga Pilipino base sa Konstitusyon.

Sa pagkakaron, wala pa gyud hingpit ibutyag sa Malacañang ang tanan nilang nasabotan ug gipirmahan atol sa pagduaw dinhi sa ni Chinese President Xi Jinping.

Kun tinuod gyud ang maong impormasyon nga gibutyag ni Carpio gipanglantawan niya nga usa kini ka pormula aron dili magkagubot.

Niubos ang popularidad ni Duterte sa uwahing survey tungod sa isyu sa WPS nga diin gidudahan siyang nibaligya sa Pilipinas ngadto sa China.

Maayong bantayan sa publiko kining maong kasabotan kun tinud-anay ba gyud nga gipalabi ang interes sa mga Pilipino ug dili sa mga Chinese. Pinaagi sa maong kasabotan dili na makainsister ang China kun unsa iyang gusto.