Hangyo ni Imee

Sigurado ko nga daghang katawhan ang nasagmuyo sa pagpirma ni Presidente Rodrigo Duterte nga ipadayon gyud karong Enero ang pagpatuman sa laing hugna sa pagkolekta og dugang buhis sa mga petroleum products.

Magpasabot kini nga mahimong ipatong na usab sa mga dealer og petroleum products ngadto sa presyo sa ilang mga baligya ang ibayad nila nga dugang buhis, ug ang apektado niini, kitang katawhan, bisan na ang walay mga sakyanan.

Sayonan ka nga kapin sa dos pesos ang buhis nga ipatong sa matag litro sa petroleum products? Nagtuo gani ko nga maminaw si Presidente Duterte sa hangyo ni Ilocos Norte Governor Imee Marcos nga isuspenso una ang pagpatuman og dugang buhis sa mga petroleum products kay suod man sila.

Nindot kaayo ang awhag ni Imee nga isuspenso usa ang pagpatuman  sa TRAIN law sa mga petroleum products bisan og bali’g usa ka tuig lang, unya wad-on pa gyud ang 12 percent nga Value-Added Tax.

Kon gituman pa kini, mapugngan gyud unta ang pagsaka sa presyo sa mga oil products.

Karon, dunay pagkunhod sa presyo sa petroleum products, apan sigurado usab ko nga mobalik ra gihapon kini sa pagsaka.

Apan kon gituman pa ni Presidente Duterte ang awhag ni Imee, dako gyud unta kaayo ang benepisyo nga mahatag niini ngadto sa katawhan.

Unta, makahunahuna si Presidente Duterte nga nindot ang epekto kon tumanon niya ang hangyo kaniya ni Imee, ug bakwion niya ang iyang gipirmahang dukomento aron dili na mosamot ang pag-antos sa katawhan sa grabeng kalisud.

* * *

Gisaad ni Cebu City Councilor Eugenio Gabuya Jr. nga iyang pangitaan og paagi nga kahimoan og kausaban ang desinyo sa pagatukoron nga Skate Park diha sa likud sa Fort San Pedro aron nga mohaum kini sa panginahanglan sa mga hilig sa maong matang sa sports.

Dayegon nako si Konsehal Gabuya niining iyang baruganan nga maminaw sa mga reklamo nila ni Margielyn Didal ug kaubanan nga mihulagway nga dili tukma ang desinyo sa pagatukoron nga skate park nga gastohan gikan sa donasyon nga P5 million ni Minnie Osmeña, ug posibleng dugangan sa pundo gikan sa siyudad.

Sigurado ko nga bisan si Mayor Tomas Osmeña maminaw sa sentimento sa mga skate board enthusiasts, ilabi na ni Margielyn Didal, kay sila man ang nasayod kon unsay tukma para kanila.

Kamong mga skate board enthusiasts ayaw mo kabalaka kay sinati ko sa batasan nila ni Konsehal Gabuya ug Mayor Tomas Osmeña nga andam maminaw sa hunahuna sa katawhan.