EDITORYAL - Serbisyong tinud-anay

Lain na usab nga kinabuhi sa usa ka bata ang nakalas tungod sa makamatay nga sakit nga dengue. Apan subo lang kaayo tungod kay gibasol karon sa mga ginikanan ang pangpublikong tambalanan sa Danao City nga gipadagan sa probinsya.

Ang maong batang lalaki nga si James Francis Gulfan nga taga lungsod sa Carmen nga natakboyan sa maong sakit gikatahong gibalibaran sa Cebu Provincial Hospital sa maong dakbayan sa dihang gidala kini didto sa iyang ginikanan niadtong Nobiyembre 26.

Matud pa katulo gyud nila gibalik-balik ang bata kinsa nagpakita na og sintomas sa gidudahan nilang dengue apan giingnan lang sila nga dili pa nila dawaton ang bata kay taas pa ang platelet.

Ang platelet sa bata nagsige og us-os apan wala gihapon maalarma ang mga personnel sa maong tambalanan hangtud nga pagka Nobiyembre 28 na kini gi-admit nga nakapahupay og kadiyot sa kabalaka sa mga tagtungod. Apan sa gihapon nagpadayon ang pagkaluya sa bata kay hasta tubig ug pagkaon di na kini modawat. Nakadesider ang mga ginikanan nga ibalhin sa laing tambalanan apan kay wa man silay ikabayad nga downpayment gibalibaran gihapon sila. Hangtud nga naabtan nalang gyud sa kamatayon ang bata nga wala gyud matabangi.

Pwerteng luoya hunahunaon ang pag-antos sa bata ug sa mga ginikanan niini gikan pa niadtong Nobiyembre 25 hangtud sa adlaw sa pagkamatay niini.

Sakit kaayo palandungon nga gihikawan sa iyang kinabuhi ang bata tungod lang sa kakuwang sa pagtagad ug kawalay kabalaka sa pipila ka mga kawani sa gobiyerno nga unta gisweldohan man sila.

Kinahanglang manubag kining maong mga kawani. Kinahanglang ipakita sa mga kadagkoan sa lalawigan nga dili lang sila kutob sa panghambog nga dako ilang koleksyon gikan sa mga tambalanan niini kondili tinud-anay gyud nga serbisyo. 

Samtang maayo unta ang koleksyon, maayo usab unta ang serbisyo nga dili masaway.