Pusong mamon sa pulis

Maayo kining gihimo sa Cebu City Police office nga pagpakita sa ilang pagpangga sa mga bata nga libudsuroy nga ilang hatagan og kalipay niining panahon sa Pasko.

Gani mismo si Senior Supt. Royima Garma, Director sa CCPO ang nagpaka inahan dihang gisugdan nila ang programa pinaagi sa pag treat sa usa ka batang babaye.

Aron at home ang bata, wala magsul-ob sa iyang uniporme si Garma kinsa misuroy kauban ang bata ngadto sa mga maanindot ug matahom nga dapit sa syudad.

Gibangkahan og lamian nga pagkaon, gipamalitan og mga bag-ong bisti, gipatan-aw og sine ug dayon gipabawnan pa gyud og kwarta alang sa iyang pamilya.

Pagkanindot pamation ug sud-ongon ang pikas nawong sa mga pulis, luyo sa ilang uniporme makita ang humok usab nila nga kasingkasing.

Mao ang gitawag nga “humanizing the police” sa mata sa katawhan nga maoy gikinahanglan karon taliwala sa mga kabalaka nga gibati sa mga tawo.

Kini ilabi na sa kontrobersyal nga programa sa PNP batok sa illegal nga drugas diin daghan ang mga namatay.

Bisan og moingon ang atong kapolisan nga legitimate ang ilang operasyon o nisukol ang mga suspek apan alang sa uban nga wala makatugkad sa ilang rason, mobati gyud og kahadlok.

Busa gikinahanglan ang dugang mga programa nila aron mapakita ang pusong mamon nga kahibawo mobati ilabi niadtong mga mas nagkinahanglan.

Mas maayo gani siguro og dili lang usa kon dili duha o lima ka mga bata kada session nila ang ilang isuroy aron mas daghan ang malipay.

Apan mas personal man pud gud kon usa lang ang ilang dad-on kay mabatyagan gyud sa bata nga espesyal siya niining panahon sa Pasko.

Ang ubang mga police offices mohimo usab og ingon niini nga programa aron mas daghang mga bata ang malipay sa panahon nga gisaulog nato ang pagkahimugso sa atong Manunubos nga Hesus.