EDITORYAL - Giabusaran si Duterte

Dili ko modupa og mga tawong kriminal! Mao kini ang direktang tubag ni Pres. Rodrigo Duterte sa pagka-kombikto sa tulo ka mga polis sa Caloocan City nga nipatay sa 17 anyos nga si Kian Lloyd Delos Santos.

Gipatay si Kian tungatunga sa paghingusog sa kontrobersyal nga “Oplan Tokhang” sa kapolisan diin wala ug tuo ang nangamatay nga drug suspects sa lehitimong operasyon sa kapolisan.

Ang mga gikombikto mao silang PO3 Arnel Oares, PO1 Jeremias Pereda ug PO1 Jerwin Cruz ug ang gipangita pang police asset Renato Loveraz.

Ang maong krimen nga nahitabo niadtong Agusto 16, 2017. Silang tanan gisilotan nga mabilanggo sud sa 40 ka tuig ug way paglaom nga makakuha og sayu-sayo nga parole. Gawas pa niana, aduna pay laing kasong atubangon ang tulo tungod sa illegal nga pagsiksik sa balay sa mga Delos Santos bisan og walay warrant.

Nigawas sa imbestigasyon ug base sa mga testigos, dili armado ug wala gyud mosukol sa mga polis si Kian, gani nakuha sa CCTV nga gidala siya sa maong tulo ka polis sa kilid sa suba diin didto kini nakit-ang patay ug may samad pinusilan.

Ang maong mga kriminal nga polis nangangkon nga “nanlaban” si Kian. Apan nigawas sa otopsiya nga ang mga samad sa bata nakuha samtang kini nagluhod ug padung motalikod.

Pila kaha ka mga kaso sa mga “nanlaban” sa record sa mga polis ang tinuod ug pila kaha ang gi-drawing lamang sa mga polis nga gusto lang og ‘accomplishment?’ Giabusaran nila si Duterte nga misaad nga manalipod kanila kun sila makapatay basta “in the performance of duty.”

Dili “in the performance of duty” ang ilang gibuhat sa bata kondili pag-abusar sa gahom.

Klaro kaayo ang gipasabot sa pangulo, duphan lang niya ang mga polis ug sundalo kun nisubay sila sa proseso ug sa balaod sa paghimo sa ilang trabaho. Leksyon nga angay timan-an sa mga law enforcement units.