Pagbalik sa ROTC

Human sa paghinay  niini sulod sa pipila ka tuig, tuyong himuong mandatory karon sa administrasyong Duterte ang mandatory nga Reserve Officers’ Training Corps o ROTC.

Gusto ni Presidente Rodrigo Duterte nga pinaagi sa pagbalik sa ROTC, mobukal ang pagka-nationalistic sa mga Pilipino.

Adunay nagung-ong nga balaudnon sa Ubos Balay Balauranan alang sa pagbalik sa mandatory ROTC. Gani mismong si Duterte ang mipdayag nga urgent ang maong bill, nagpasabot nga angay lamang kinin nga dalion pagpasar sa mga magbalaud.

Dinhi sa lalawigan sa Sugbo, adunay lima ka pangpublikong tunghaan nga nagtanyag og senior high school ang himoon nga pilot area alang sa implementasyon sa ROTC, nga gidusong sugdan sa sunod tuig kon sayong mapasar sa Kongreso.

Apan daghan ang wala makauyon sa lakang pagbalik sa mandatory ROTC. Hinuon dili nato sila mabasol tungod kay, alang kanila, walay nahimo ang ROTC alang sa pagpalambo sa kinaadman sa mga estudiyante.

Dugang lamang kini sa kasahol sa mga estudiyante, matud nila, gumikan kay dili kini magamit pagpalambo mismo sa pagkatawo sa mga estudiyante, ilabina panahon sa ilang pagpangempleyo.

Mao nang wala silay rasong nakita sa dakong importansiya sa ROTC.

Alang kanako, usa sa butang nganong dili na angay banhawon pa ang mandatory ROTC mao ang dakong balana sa reputasyon niini. Sa implimentasyon niini kaniadto, daghang kaso sa pagpang-abuso sa mga ROTC officers ang narekord sa otoridad.

Daghan nang mga kaso kaniadto mahitungod sa mga kadete sa ROTC nga nangaangol ug nangamatay tungod sa hazing ug uban pang pag-abuso gikan sa ilang mga officers.

Ug kining mga  insidente naghatag usab og hugaw nga reputasyon sa mga eskwelahan.

Gani, usa kini sa nag-unang mga rason ngano nga gisentensiyan sa kagamhanan nga wad-on na ang mandatory ROTC gumikan sa grabe nga pag-alburoto sa katawhan batok niini. Ug angay lamang nga hunahunaon sa kagamhanan ang pagbanhaw niini.

Hinuon dili usab mahimo nga wad-on na gayud ang ROTC. Adunay mga estudiyante ang gusto mopailalum niini. Ilabina niadtong gusto nga mosulod sa Philippine National Police ug Armed Forces of the Philippines. Apan dili gayud kini angay nga hinuong mandatory.