Kid at Heart sa Pasko!

Dali ra gyud kaayo ang panahon, ikatulong adlaw na sa Disyembre nagpasabot nga Pasko na gyud.

Alang sa uban mas excited magsaulog sa Pasko kay sa kaugalingong birthday kay ang rason nga sa birthday magkadako man ang edad, apan kon sa Pasko magpabilin man ang memories sa pagkabata.

Ang mga bata hilabihan ka maya sanglit panahon man kini nga makadawat sila sa mga regalo gikan sa ilang mga maninoy ug maninay.

Apan tingtago sab kuno kini sa mga adunay kinugos nga kuripot hehe, bitaw siguro ang uban gikinahanglan nga pahinumduman sa ilang mga inanak kay basin malimtanon na si ninong ug ninang nga dili na makaila tungod sa katigulangon.

Bitaw sa mga dagko o bisan sa mga tigulang, ang Pasko panahon nga manumbalik ang matam-is nga kagahapon sa pagkabata.

Nindot kaayo balikan ang panahon nga libre ang tanan, walay problema, puno sa katawa kauban ang mga higalang bata nga manaygon sa bisan asa.

Makaingon bitaw kita nga kon ikabalik pa lang ang panahon, igo nalang kita sa pangindahay kay dawaton nato ug sa dili kutob nalang kita sa paghandum sa sa mga precious Christmas memories.

Bisan og edaran na apan magpabilin gihapon ang gitawag nato nga “kid at heart” dili lang sa Pasko kon dili kada adlaw aron sama sa bata magmalipayon kita.

Mabaw ra ang kalipay sa bata nga makontento ra sa bisan unsa nga magustohan nga angayan usab nato nga pabiling batonan.

Busa kon adunay mga bata nga manaygon, ayaw intawon aboga kay usa ka higayon sa atong pagkabata nakasinati usab kita niana.

Kun walay sinsilyo pwede man sad kun tibook o papel de banko ang ihatag o kun wala gyud mahimo nga ang salamat uban ang tam-is nga pahiyom maoy ihatag.