lad ug hudlat sa presidente
Hinaot nga di na magpailad si Presidente Rodrigo Duterte sa iyang economic managers. Kinsa inay nga mangayo og pasaylo sa dagko uyamot nilang kasaypanan karong tuiga nagpaugat pa gyud sa pag-inat sa ilang mga sipyat hangtod sa bag-ong tuig.
Inay tahuron ang sugo sa presidente sa pagsuspenso sa dugang buhis sa mga produkto sa lana sugod sa Enero 1, 2019 sa ikaduhang tuig sa pagpatuman sa Tax Reform for Acceleration and Inclusion (TRAIN) Law, niinsistir sila nga ipadayon pagbunal ang dugang buhis nga P2 matag litro sa krudo ug gasolina.
* * *
Ang sukaranan nilang Finance Secretary Sonny Dominguez ug kaubanan mao ang nagpadayon nga pagtidlom sa presyo sa lana sa merkado sa kalibotan. Gani kon way dagkong kausaban, mahimong makapahimus na sab ang mga motorista og laing us-os sa presyo sa lana sa ika-walo nga sunudsunod nga semana sunod semana.
Angay natong hinumdoman nga samang grupo nilang Dominguez ug kaubanan ang namugos sa pagpahamtang sa TRAIN tungod sa ilang pangagpas nga magpabiling ubos ang presyo sa lana.
Ang sayop nilang pangagpas nisangpot sa nahiagoman natong grabeng krisis sa ekonomiya karong tuiga.
* * *
Way garantiya nga ang pagbarato sa lana magpadayon hangtod sa bag-ong tuig. Ang economic managers ni Presidente Duterte mas nahibawo kay natong ordinaryo nga mga magbubuhis nga ang kalibotanong industriya sa lana di demokrasya.
Mahimong maniobrahon sa higanteng cartel sa Organization of Petroleum Exporting Countries (OPEC) inabagan sa non-OPEC countries sama sa Estados Unidos ug Russia ang kalibotanong suplay aron mobalik pagsulbong ang presyo sa lana ug mas moburot ang ilang ginansiya.
* * *
Nabalaka ko nga ang economic managers ni Duterte nakalimot nga mga ekonomista sila ug di propagandista. Kay nangahas na sila pagpasidaan sa presidente nga kon suspensuhon gyod ang dugang excise tax sa lana motidlom ang nasudnong panudlanan ug masakripisyo ang iyang Build! Build! Build! projects.
Angay’ng pahibaw-on ang presidente nga ang wa maggasto nga bahin sa budget sa niaging duha ka tuig mas dako pa kon itandi sa ilang gibugalbugalan nga under-spending sa pamunoan ni kanhi Presidente Noynoy Aquino.
Nganong mamugos man ang iyang mga magtatambag sa pagpangolekta og dugang kuwarta nga wa man gani nila mahurot paggasto ang karaang kuwarta?
* * *
- Latest
