“Misquoted lang”

Nangayo og pasaylo si Senior Supt. Manuel Abrugena, Director sa Cebu Provincial Police Office kalabot sa migawas nga report sa pamantalaan nga dunay mga opisyal sa Dakbayan sa Talisay ang nalambigit o protektor sa illegal nga drugas.

Nakapaulbo kini sa kaspa sa mga opisyal sa Talisay City dungan sa ilang paghagit sa opisyal sa CPPO nga hinganlan kon si kinsa ang mga nalambigit sa illegal nga kalihokan.

Dili kuno makatarunganon nga maduhig ang tanan sanglit masentro man sila sa pagduda sa katawhan.  Apan hugtahon nga gipanghimakak ni Abrugena nga namasangil siya sa mga opisyal sa Talisay.

Matud niya nga misquoted lang siya sa pamantalaan diin napatik ang naasoyng taho. 

General statement lang kuno ang iyang giluwatan nga adunay mga opisyal sa lalawigan nga tigdawatan og drug protection money.

Apan wala siya mag-mention kon asa nga dapit dinhi sa Sugbo ang naasoyng mga opisyal sanglit nagpadayon pa ang ilang validation.

Misquoted man o dili, ang issue mao nga adunay nalambigit sa drugas nga mga opisyal sa kagamhanan.

Bitaw, dili lalim nga dudahan sama sa gibati sa mga opisyal sa Talisay City apan kon limpyo ang ilang konsensya tungod kay wala sila maghimo sa dautang binuhatan, aw dili sila maapektohan.

Kadtong mga nalambigit maoy angayan makulbaan tungod kay nasayod naman seguro sila kon unsa ang ilang posibleng dangatan.

Halos kada adlaw o semana aduna gyuy mangahay-ad nga mga tawong nalambigit kuno sa illegal drugs sa Talisay.

Bisan og anaa na diha gi-assign ang mga sakop sa Regional Mobile Force Battalion apan aduna man gihapoy nagpadayon sa illegal nga kalihokan.

Unsa man ang gihimo sa LGU sa Talisay ani?