Nagkamenos ang kopras

Wala ba kamo mahibulong kon nganong midaghan karon ang namaligya og mga butong? Tingali, nagtuo kamo nga ang rason niini mao nga halinon man gud kay daghan ang manginom og buko juice ug mokaon og butong.

Dinhi sa dakbayan sa Sugbo, naglinya diha sa Echavez Street sa Barangay Zapatera ang namaligya og buko juice.

Apan ang daghan gyud mao ang mga manuroy og butong nga ikarga og mga karomata.

Ang tinuod nga rason ngano nga ang mga nanag-iya og kalubihan dili na ganahan nga mokopras sa ilang lubi kay mibarato diay kaayo ang presyo sa kopras.

Nahinabi nako ang mga tigtumod og butong diha sa Carbon Public Market ug ilang gikonpirmar nga tinuod ang gibutyag ni Ilocos Norte Governor Imee Marcos nga nag-atubang sila karon og dakong problema.

Base sa talaan sa Philippine Coconut Authority (PCA), tag P18 lang ngadto sa P22 ang kilo sa kopras sa miaging buwan. Mga tulo ngadto sa upat ka lubi ang kada kilo.

Sa ato pa, kon ang mga tag-iya og kalubihan mobaligya sa ilang butong sa kantidad nga P10 kada usa, mas bentaha pa, kay sa ilang koprason.

Kadtong tigkompra, mobaligya sab og tag P25 kada “garapon” sa buco juice nga gikan lang sa katunga sa usa ka butong.

Ang statistics sa PCA nagpakita nga adunay kapin tulo ka milyon ka mga nanag-iya og kalubihan nga nag-antos karon sa problema sa pagtibuksok sa presyo sa kopras.

Nalipay na lang hinoon ang mga coconut farmers nga si Imee Marcos nagpakabana sa ilang problema. Gisaaran sila ni Imee nga tabangan sila pagsulbad sa ilang problema kon mapili siya nga senador.

* * *

Nasurpresa ko kay nikontak nako si Dr. Paulus Cañete ug nagpasalamat kay nakabasa diay siya sa atong lindog nga naghisgot sa programa niya paghatag og food assistance sa mga nagbantay sa pasyente sa Vicente Sotto Memorial Medical Center nga mga taga 6th district.

Dinhi gud sa atong lindog, dayegon nato ang mga maayong binuhatan, ug sawayon kadtong mga tan-aw nato, dili maayo.

Gawas nga kauban namo sa media si Dr. Paulus, nindot man sab gyud ang iyang programa. Sayonan ka nga mikuot siya’g kuwarta gikan sa iyang bulsa, ug gigahin aron gastohon alang sa pagkaon sa mga nagbantay sa mga pasyente?

Gitug-anan usab ko ni Dr. Paulus nga apil diay sa iyang programa mao ang pagpalambo sa edukasyon ug sa pag-atiman sa maayong panglawas.

Nindot gyud kaayo kining imong programa Doc Paulus, mao nga paninguha gyud nga modaog ka pagka provincial board member.