Death squad batok NPA?

Atol sa iyang pakigpulong didto sa lalawigan sa Bohol niadtong Martes, gibutyag ni Presidente Rodrigo Duterte ang iyang plano pagtukod og “death squad” batok sa mga rebelde nga maoy magsilbing pang-alkontra sa “sparrow unit” sa New People’s Army.

Matud ni Duterte nga ang iyang “death squad” langkuban sa mga armadong civilian nga iyang ipakatap sa mga terminal, kan-anan, ug ubang dapit nga daghan og tawo aron pagpangita sa mga rebelde ug kadtong mga gidudahang rebelde.  Maisogon nga gipahibawo sa presidente nga iyang tugbangan ang abilidad sa mga rebelde pagpatay.

Ug sama sa gipaabot, nakasugat dayon og pagsaway gikan sa mga militante ang pamahayag sa presidente. Hugtanong gikondinar sa mga lider sa nagkadaiyang militanteng grupo ang plano ni Duterte. Kuwang ko sa pagtuo nga buhaton ni sa presidente. Isip abogado sayod siya nga illegal ang buot niyang buhaton.

Dili mahimong iyang largohon og patay si bisan kinsa nga gidudahang rebelde tungod kay dunay balaud nga angayang subayon. Isip presidente sa nasud iyang tahas ang pagsiguro nga ang tanang balaod sa nasud mapatuman sa husto ug makiangayon nga paagi.

Dili makatabang ni Duterte ang iyang kalagala ug ang pagpataka og yawit sa way paghuna-huna angayan ba o dili ang iyang gipamulong. Mao ni hinungdan nga mapasanginlan ang iyang administrasyon nga responsable sa mga nahitabong patay dinhi sa nasud.

Wala gyud siya makakat-on og leksiyon sa iyang kampanya batok sa illegal nga drugas. Tungod sa pagpunay niya og pangandak nga iyang patyon ang mga nalambigit sa drugas, ang tanang patay gipasangil na hinuon niya.

Ang resulta gireklamo iyang administrasyon atubangan sa International Criminal Court of Justice nga maoy nagpaluyo sa tanang patay dinhi sa nasud. Human sa iyang pamahayag didto sa Bohol, nahadlok ko nga dunay mosakay niini ug si Duterte na sab ang pasanginlan.

Angayan tingali nga minusan sa presidente ang iyang kalagala aron di siya masugamak sa kontrobersiya nga way hinungdan. Kun seryoso siyang puhagon ang mga rebelde, wala niya kinahanglana ang civilian death squad paghimo niini tungod kay takos ang militar ug kapolisan sa maong tahas.