Alang sa asa man ang PLEB

Human sa kontrobersiya tali sa PNP ug sa Ang Probinsiyano. Kay lagi ang maong serye nihulagway kuno sa mga polis nga mga buluyagon. Depensa pud ni Senadora Poe nga: Bato-bato sa langit, ang matamaan huwag magagalit!” Dili pa lang dugay nahitabo sa Mezzo Hotel ang Pleb Legal Skills Seminar alang niadtong mga nagkadaiyang LGU’s sa Sugbo nga dunay PLEB.

Sanglit apil man ko ini sa Sogod mao nga nitambong ko kuyog ang ubang mga taga Sogod nga sila si Konsehal Elmer Ceniza, Ziv Ceniza ug Mam Flor Presillas. Si Atty. Masnar ang usa sa mga Resource Speakers. Gihisgutan ang hustong proseso sa pagsang-at og mga administrative cases batok sa mga buluyagong mga polis.

Hinuon gitataw niya nga ang People’s Law Enforcement Board (PLEB) dili kaaway sa mga polis kondili kauban aron mamahimong mas hapsay ang kinabuhi diha sa pagpamulis kuyog sa mga sibilyan. Dili kini panghinaway apan pagdasig sa mga polis aron magpabiling ligdong ug tiunay diha sa ilang pangalagad.

Ug kay may paryente man ako nga mga polis ug gani bayaw nga polis nadasig ako sa pagtuon niini kay aron makahatag ako og igong pagtagad kun ugaling gikinahanglan ang pagdasig ug pahukngay.

Mao nga kun ugaling dunay polis nga gamiton ang pusil aron ipaypay sa barbecue aron maluto dayon kini ug aron hulgaon ang mga yanong tindera duola ang PLEB kay sa himoon ang dugoong pagpitol sa mga kabaro ni Ricardo Dalisay. Ug kun dunay pangutana pakisayod lang sa DILG.