Ang lubi

Sigun sa datus, mokabat sa 153 milyones ka tonelada nga lubi ang gibaligya sa Pilipinas sa kalibotan. Tungod niini giila ang Pilipinas nga ikaduha sa nagtanom ug nagbaligya og produktong lubi sa tibuok kalibotan. Nag-una sa kalibotan mao ang Indonesia.

Gibana-bana nga ang ikaupat nga parte sa yuta sa Pilipinas nga gipangtamnan, gitamnan og lubi kasagaran niini sa Southern Tagalog, Bicol Region, Eastern Visayas, Western ug Southern Mindanao.

Apan ang dili maayo, daghan sa mga dapit sa Pilipinas nga nagsalig sa lubi nagpabilin ug kanunay nga naapil sa 20 ka mga kabus nga lalawigan sa nasud.

Sa Pilipinas gibana-bana nga adunay 3.5 milyones ka mga mag-uuma og lubi ug kasagaran sa ilang produkto mao ang kopras, tubig butong, gatas, virgin coconut oil ug harina. Mayoriya sa mga mag-uuma og lubi nagsalig sa kopras.

Apan nakasinati karon og suliran ang mga mag- uuma og lubi tungod sa padayon nga pagtibugsok sa presyo sa kopras sa merkado sa kalibutan ug nahitabo pa kini sa buwan sa Hunyo - Oktobre diin himalitan unta ang kopras.

Sigun sa datus sa Philippine Coconut Authority, ang average farm-gate nga presyo sa kopras nagpabilin sa 18-22 pesos ang kilo niadtong Oktobre. Pero ang farm-gate nga presyo sa Eastern Visayas tag 15.62 pesos lamang ang matag kilo.

Dako kini nga pag-ubos sa presyo nga P25 matag kilo sa unang quarter niining tuiga.

Kun magpadayon, madugangan og 10 porsiyento ang gidaghanon sa mga pobre ang mga lalawigan nga ang produkto kopras.

Si Ilocos Norte Gobernador Imee R. Marcos nga nakasabot, misugyot og dinaliang pagtubag sa suliran pinaagi sa pagpautang sa mga mag-uuma, pagpuhag sa mga smuggler ug ang pagpatuman sa Biofuels Act of 2006.

Kining sugyot ni Marcos mahatagan lamang og katumanan kun mapili siyang Senador sunod tuig nga eleksiyon.