Anino sa Dengvaxia

Nagpabilin nga dakong hagit sa mga health workers unsaon pagkombinser ang mga ginikanan aron pabakunahan ang ilang mga anak.

Lakip niini ang bakuna sa tipdas nga gikinahanglan gyud kaayo aron malikay sa grabeng kadaut ang mga bata gikan sa maong balatian.

Bisan og libre pa ang naasoyng bakuna apan tungod kay nitagam na ang mga ginikanan murag sirado na gyud ang ilang utok kon bakuna na ang hisgotan.

Ang nakaingon niini ang kontrobersyal nga dengvaxia nga alang sa dengue nga nakapalisang gyud sa halos tanan nga katawhan.

Bitaw dili man pud nato mabasol ang mga ginikanan sa ilang gibati nga kahadlok tungod kay nakataya man usab ang kinabuhi sa ilang mga anak.

Apan angayan nga sabton sa mga ginikanan nga ang gilantaw sa mga tinugyanan sa panglawas ang kaayohan sa ilang mga anak kon tipdas na ang hisgotan.

Kahinumduman dihang wala pa mibuto ang isyu sa dengvaxia, wala may problema sa pagpamakuna sa tipdas ug ubang mga balatian.

Dako kaayo kini og ikatabang aron malikayan nga adunay mga bata nga makalas sa tipdas tungod kay wala mabakunahi.

Mas pahugtan pa seguro sa mga health personnel ang pagpakig-alayon sa mga eskwelahan kansang mga magtutudlo mao usab ang mopasabot atol sa ipatawag nga meeting uban ang mga ginikanan.

Dako nga budget ang gigahin sa gobiyerno alang niini busa angayan nga pahimuslan kini sa katawhan.

Angayang wagtangon ang anino sa dengvaxia sa bakuna sa tipdas.