Ayuda sa mag-uuma

Salamat nga way dakong kadaot nga gibilin ang bagyong si Samuel dinhi sa Sugbo.

Gawas sa pagkabalda sa klase sa mga tinun-an ug sa dyutay nga pagbaha sa kadalanan, way danyos ang maong bagyo.

Salamat usab sa mga nagtukaw nga mga opisyal ug kawani sa gobiyerno pagbantay ug pagpangandam aron malikayan ang posibleng mga kinabuhi nga makalas.

Human mogawas si Samuel sa Philippine Area of Responsibility nagsunod sab dayon ang hulga sa bagyong si Tomas.

Dili na hinuon ni bag-o alang sa Pilipinas ang pag-igo sa sunod sunod nga mga bagyo. Basi sa pagtuon sa United Nations Office for Disaster Risk Reduction niadtong 2016, ang Pilipinas maoy ikaupat nga nasud sa tibuok kalibutan nga kanunay maigo sa katalagman.

Sigun sa pagtuon, kapin sa 1,000 ka mga kinabuhi ang makalas tungod sa bagyo dinhi sa Pilipinas matag-tuig. Gibana-bana sab nga 70 porsiyento sa danyos sa bagyo apektado ang agrikultura.

Busa matag higayon nga dunay moigo nga bagyo ang labing luoy ug apektadong sektor mao ang mga mag-uuma. Ug sa matag higayon, ang sagad mga tubag sa atong gobiyerno sa ilang panginahanglan mao ra ang pagpanghatag og relief goods sulod sa pipila ka adlaw ug dayon hikalimtan na.

Napasagdan ang mga mag-uuma nga maningkamot sa ilang kaugalingon aron makabarog pagbalik.

Ang nakapait kay gigamit pa silang puhonan sa ubang mapahimuslanon sa gobiyerno aron makatigom og pundo nga ilang makurakot. Unsay nahitabo sa mga biktima sa Yolanda?

Panahon na aron hatagan og prayoridad ang pagtabang sa mga mag-uuma nga maapektuhan sa bagyo.  Dili igo ang paghatag nila og libre nga bugas ug pagkaon sud sa pipila ka adlaw.

Dunay sugyot si Ilocos Norte Governor Imee Marcos unsaon sa gobiyerno ang pagtabang sa mga mag-uuma. Matud niya nga angayang sagakayon sa kagamhanan ang mga apektadong mag-uuma pinaagi sa konkretong programa nga iyang gitawag og Living Income for Farmers in Emergency (LIFE).

Pinaagi niini siguroon nga kahatagan og trabaho ang mga mag-uuma samtang gipaubos sa rehabilitation ang ilang mga umahan.

Iyang sugyot nga sweldohan sa gobiyerno ang mga mag-uuma aron maoy motabang pag-ayo sa mga nangaguba nga imprastraktura sama sa karsada, taytayan ug irrigation dikes. Sa akong tan-aw dili lisud ipatuman ang maong sugyot.