EDITORYAL - AFP batok krimen

May mga kabalakang nitumaw sa habig sa pipila ka mga magbabalaod ug mga militanteng mga pundok bahin niining Memorandum Order No.32 ni Pres. Duterte nga mao ang pag-deploy og dugang tropa sa militar ug kapolisan sa mga piniling rehiyon sa nasud.

Ang maong mga rehiyon mao kadtong adunay mga nahitabong pagpangatake sa mga walhong pundok ug pagsaka sa bayolenteng krimen. Ang mga sundalo ug polis gipadala sa Negros Oriental, Samar ug Bicol region.

Kung susihon og maayo, ang maong mga rehiyon mga lugar kini nga aduna pay aktibong kalihokan sa mga rebeldeng komunistang New Peoples Army, ug sila usab ang mga suspek sa pipila ka mga nahitabong linoog nga pagpatay sama sa nahitabo sa siyam ka mag-uuma sa Negros Oriental ug ang pag-ambush sa tropa sa militar didto sa Samar niining tuiga.

Ang tumong sa MO No.32, pangusgan sa kapolisan ug militar ang ilang mga operasyon batok sa mga kriminal ug sa mga nagtisok og kagubot og kasamok aron mopatigbabaw ang kalinaw ug kasigurohan sa mga namuyo.

Apan may mga kabalaka ang pipila ka mga militanteng mga magbabalaod kay nahadlok silang sinugdanan na kini sa pagpatuman og nationwide martial law ni Pres. Duterte sama sa nahitabo karon sa Mindanao.

May katarungan silang mabalaka sa martial law tungod sa mahitabong paghigpit unya sa gobiyerno sa mga kagawasan nga gigarantiya sa Konstitusyon ngadto sa matag Pilipino.

Apan gihimakak kini mismo sa militar kay matud pa regular lang kini nga mando aron batokan ang kriminalidad ug mapanalipdan ang kinabag-an.  Kay ang mga kriminal wala may pili kon mamiktima.

Dako gyud og ikatabang sa kampanya alang sa kalinaw ug seguridad ang militar isip kaabag sa kapolisan.

Basta dili lang sila molapas o manamak sa tawhanong katungod sa katawhan , sigurado silang suportahan o panalipdan  sa mga tawo.