Misikat lang pagkalit

Wala gyud ko masayop sa akong giingon kaniadto nga ang popularity rating ni Special Assistant to the President (SAP) Christopher Lawrence “Bong” Go, mosaka ra kon magkaduol na ang eleksiyon.

Karon, mikalit lang pagsulbong ang iyang kainila ug anaa na si Bong Go sa “Top 8” sa mga kandidato pagka senador, base sa nationwide survey nga gihimo sa mga sibyaanan sa Manila Broadcasting Company.

Ang survey gisalmotan sa 7,450 ka tawo nga nagtuo nga daghan kaayo og mabuhat nga kaayohan si Bong Go kon modaog pagka senador.

Sa interview sa radio, gibutyag ni Go nga ang iyang mga programa, gawas sa paghimo’g balaod, mao ang pagpalambo sa pag-atiman sa maayong panglawas sa katawhan, pagpalambo sa edukasyon ug daghan pa.

* * *

Wala pa gani magsugod ang “official campaign period” pero gipangkutasan na ang mga kandidato nga nagsige na og pangampanya pinaagi sa pagsuroy sa kabarangayan.

Sila si Mayor Tomas Osmeña ug Vice Mayor Edgardo Labella nga maoy magtigi sa pagka mayor sa dakbayan sa Sugbo, kanunay lang nga wala sa ilang mga opisina kay nangampanya na.

Mao usab diha sa Mandaue City, busy na kaayo sila si Mayor Luigi Quisumbing nga wala na mahimutang kay giatbangan man siya ni Kongresista Jonas Cortes nga maoy mayor kaniadto.

Sa Talisay City, mibalik usab pagpapili si kanhi mayor Johny de los Reyes (JVR), ug magsangka sila si Kongresista Samsam Gullas nga gusto na nga mahimong mayor.

Sa Toledo City, mora’g may kausaban pa tingali kay nakadungog ko nga dunay i-substitute nga kandidato.

Hisgotan nato kini liwas sa Nobiyembre 29 nga maoy katapusang adlaw sa pag-ilis ug kandidato.

Kon kinsa ang lig-on niining maong mga nagkaatbang nga kandidato, anaa ra gyud sa ilang tagsatagsa ka mga pamaagi sa pagpangampanya. Apan mag-unsa man kon maayo ka nga mokampanya unya wala kay kuwarta?

* * *

Sa Dakbayan sa Mandaue, mora’g nagkagubot ang City Council kay dunay gihimong reorganization sa mga komitiba nga gisupak sa pundok nila ni Mayor Quisumbing.

Si Cortes maoy gisuportahan sa labing daghang kapitan sa  27 ka barangay sa Mandaue, ug pipila ra ang tua midapig kang Quisumbing.

Samtang dinhi sa Dakbayan sa Sugbo, ang kadaghanan sa mga kapitan sa barangay mga kaalyado ni Mayor Osmeña ug pipila ra ang mga alalay ni Labella.

Matud pa nga daghan og kuwarta ang kampo ni Osmeña, apan makabentaha si Labella kon buboan siya og kuwarta ni Presidente Duterte.