83 anyos nga pasyente gibalibaran sa hospital

Ang hangyo sa usa ka pasyente kon asa siya gusto magpa confine mao gyud unta ang angayan tumanon ilabi na kon ang pasyente tigulang na nga mao gyud ang masunod.

Sama sa akong 83 anyos nga inahan kinsa sulod gawas na sa tambalanan, ning bag-o lang nagluya na sad og dili na kabangon. Dili man siya magpadala sa hospital maong sige namo kombinser hangtod misugot nga dad-on.

Apan ubos sa kondisyon nga siya mopili sa tambalanan nga mao ang pribadong hospital sa Mandaue nga duol sa City hall. Kampante kuno siya didto kay nakasulay man siya sa una nga niarang arang kuno iyang pamati.

Akong gitumanan siya sa iyang gusto bisan distansya lang ang among lokasyon kay sa Lapu-Lapu City man mi gikan.

Pag-abot namo sa hospital nga dunay kapareha og ngalan sa political family, miingon ang nurse nga mokuha siya og wheelchair kay dili naman makabarug og dili na sad makatingog. Niadtong tungora emergency na gyud ang sitwasyon kay sensitive kaayo ang edad sa akong inahan nga 83 anyos na. Apan nigawas ang usa ka nurse nga babaye niiningon nga wala nay bakanteng lawak sa tambalanan. Naa kunoy duha ka room para lang sa mga lalaki ug dili pwede sa babaye.

Akong gihangyo nga bisan sa emergency room lang una hangtod dunay bakante apan dili sad kuno pwede.

Akong gipangutana nga mobalibad ba sila sa pasyente kinsa gamay nalang kulang mabugtoan na sa ginhawa?  Ang tubag sa nurse dili sila mobalibad pero mas maayo dad on sa laing hospital ang akong inahan.

Dugang nako nga mam emergency naman ni iyang sitwasyon, ang iyang tubag, nagpitokpitok pa kuno ang mata sa akong mama bisan nagpiyong na, siyempre molihok gyud kay buhi pa man.

Migawas ang lalaking doktor niadto sa sakyanan diin milili lang sa bintana ug miingon nga sa mga dagkong hospital ipadala kay grabe na.

Wala magkatugma ang ilang pamahayag sa nurse nga klaro kaayong galikay nga didto mabugto kinabuhi sa pasyente.

Kahibalo ko nga dakong kalapasan ang ilang pagbalibad sa pasyente apan nagpugong lang ko sa akong kaugalingon gidala nako sa laing private hospital diin siya na confine karon nga mihatag og maayong pagatiman sa himatyon nakong inahan. Pastilan asa naman ang kasing kasing sa mga staff sa tambalanan? Klaro man nga dili puno kay mingaw man ang tambalanan.

Dili nako nganlan ang tambalanan apan kon mabasahan kini sa iyang kapangalan nga politiko, sulayi og examine ang inyong mga staff kon naa pa ba ang kasing kasing sulod sa ilang dughan.