Drivers licensing sa LTO kalbaryo

Tuig 1994 maoy una nakong paglukat og driver’s license sa Land Transportation Office (LTO).

Human makapasar sa eksam, written ug physical ug makabayad sa licensing fee, gikodakan dayon ko sa in-charge ug paglabay sa pipila ka mga gutlo, nakuha na nako ang akong lisensiya.

Sobra ka tam-is ang nagpahiyom akong hitsura sa maong plastic card license.

Wala gyuy bisan gamayng linya sa agtang nga mikunot.  Lalim bay, walay duha ka oras, akong tuyo nahuman. Pagkadali!

Apan karon, haskang hasola sa proseso nga agian sa mokuhag driver’s license. Labi na, kay ang LTO Main, Cebu City mibalhin sa ilang processing ug releasing didto sa SM City Seaside, ay, pastilan...mora gyud og gipasubay nila sa tunokong kalbaryo ang manglulukatay.

Hunahunaa lang. Wala pa gani mobidlisiw ang adlaw sa silangan, naglaray na mga anino nga mokuhag driver’s license.

Usa nila, mitug-an nako nga alas 3:30 sa kaadlawon, misugod na silag linya sa gawas sa siradong SM nga sa alas 10:00 pa sa buntag mangabli.

Basta, alas 7:00 a.m. pa lang, magsugwaksugwak na ang maglinya, diin gibalewala na lang ang kakamig sa kaadlawong hangin ug miugom na lamang og candies pagalam-alam sa nagkutoy nilang tiyan nga wala pay pamahaw.

Pag-abot sa alas 10:00 sa buntag, naabli ang gahing ganghaan sa LTO Processing/Releasing Area, SM City Seaside.

Misamot kabug-at ang krus nga gipas-an sa mga aplikante kay kutob usa ka gatos ray dawaton sa LTO. Ang sobra, sorry na lang. Kay come earlier next time, maoy ilang patakaran. Mao ba?

Kahilakon ‘tong usa ka maestra nga misumbong nako: “Abi nimo, Sir, four times na ko sigeg balikbalik diri, di gyud ko maapil sa 100 nga giihap. 9:00a.m. pa baya ko diri.

Mao nga mouli na lang ko.” Luoyang Ma’am, uy!

Ako mismo, nakasinati ning kalbaryo nga gipas-an sa mga nanguhag driver’s license.

Mipayl ko’g Nobiyembre 5, pero nakuha nako ang plastic license pagka Nobiyembre 14 na. Makakonsimisyon, uy!

LTO Region 7 Director, ngano man ni, Sir? Di ba mialkontra man kini sa mando ni Duterte nga papaspasan ang pag-release sa gikinahanglan sa katawhan diha sa bisan asang buhatan sa gobiyerno?  Ato ning pangitaag paagi, Sir, bi, nga madali!