Juvinile Justice Law angay’ng wad-on

Sukad pa niadtong pagkatawo niining Juvinile Justice Law nga gihimugso ni Senador Francis ‘Kiko’ Pangilinan sa sabakan sa Senado niadtong 2006 nga ginganlag  Republic Act 9344 (Juvinile Justice and Welfare Act) usa ko sa daghan nga wala makauyon ning maong balaud.

Tiaw bay, kun ang menor de edad makapatay og tawo, dili mapriso. Makalibog! Nganong nakalusot kini sa Senado nga 24 man ka Senador ang moayag-hashas niini sa dili pa maaprobahan? Nagpasabot ba kini nga mayoridad sa ilang mga utok pareha sa kang Kiko, sintunawo sab?

Wa gyud makahatag og kaayuhan sa nasud kining balaura. Wala ni magtudlo sa mga menor de edad pagsubay sa hustong dalan sa kahayag; kun dili, gigiyahan hinuon ang mga bata pagpakabuhi sa kangitngit ug pag-ambak ngadto sa kalayo sa impiyerno.

Kining maong balaud naghatag og dakung pabor sa mga dautang elemento, diin gigamit ang mga menor de edad, alang sa pagpang-hold-ap, pagpanulis ug ang dili mahinugon pagpatay sa misukol sanglit dili man mapriso ang mga bata bisan pila pa ka biktima ang ilang pamatyon.

Mao baya ni rason nganong nibaha ang mga menor de edad nga nagumon sa gidiling drugas sa bisan asang suok sa atong nasud. Sagad nila, dili na maluoy mopatay sa ilang inahan, amahan, apohan o igsuon. Kay may balaud lagi si Kiko nga nagprotehir sa mga batang kriminal.

Wala makaagwanta si Presidente Rodrigo Roa Duterte. Atol sa iyang pagpamulong sa gipahigayong First Subaraw Biodiversity Festival didto sa Puerta Princesa, Palawan, Nobiyembre 10, iyang giingnan si Kiko atubangan sa publiko nga, ‘ikaw yong abogado nalaman kong pinakabobo sa lahat!’

Unya sa pagpadayon sa Pangulo pagsaway sa maong balaud nga gipangamahanan ni Kiko, wala na sab  kapugngi ang pinugngang pamalikas ni Duterte timaan sa nagpangagot niyang kasuko.

Klaro man kaayo kun unsang mensahea ang gustong ipaabot ni Tatay Digong, dili lang ngadtong Kiko, kun dili sa tibuok Senado gayud. Gani, bisan ako nga usa lang ka ultimo, nakasabot man nga ang maong balaud daw nag-culture lang sa kabataan nga mahimong mga kriminal.

So, my dear House of Senate, unsa pay atong gipaabot? Wala gyuy nada ning balaura. Ato na ning wad-on, uy!