Kanunay’ng magkurog

Kun tuohan nimo ang report nga dunay mga tawo nga buot mosunog sa balay ni Tejero Barangay Konsehal Jingjing Cadungog, makaingon kita nga dili na gyud kay basta-basta lang nga problema kining iyang giatubang.

Una, buot kunong patyon si Cadungog niadtong polis apan naunhan ug napatay lang sa iyang bodyguard-driver didto duol sa ilang barangay hall. Gipasakaan og kaso sa kapolisan si Cadungog tungod sa pagpatay sa polis, apan ang kaso gi-dismiss sa piskaliya.

Nakagawas man tuod sa bilanggoan si Cadungog apan nagtago-tago na karon kay nahadlok.

Buyno, kun tinuod man nga may buot mosunog sa balay ni Cadungog kay naglagot niya, dili kini tukma nga lakang kay maamong man ang walay labot.

Ayaw ninyo kana pagabuhata kay luoy usab kaayo ang ubang mga molupyo nga maapil pagkasunog ang ilang balay.

Kun nagtuo kamo nga si Cadungog nakahimo og salaod, himoa ninyo sa makiangayong paagi kay kun sunogon ninyo ang iyang balay, maangin ang uban.

Pastilan, daghang kwartahan nga mura’g wala na hinoon sila’y kagawasan pagka-karon kay gilambigit sa gidiling drugas. Apil kanila mao si Peter Lim ug ang higala nako nga si Daanbantayan Mayor Vicente Loot. Kang Loot mura’g maglisud gyud ko pagtuo nga nalambigit siya sa drugas.

Dugaya pa ra ba mahuman sa termino ni Presidente Duterte. Nagpasabot nga taas pa kaayo ang pag-antus niining maong mga tawo nga gigukod sa kapolisan tungod sa kampanya batok sa drugas.

Bahin ni Cadungog, ambot kun unsa gyud ang tinuod bahin niya.

* * *

Ang kagamhanan sa Dakbayan sa Sugbo nihatag og serbisyo ngadto sa mga call center agents nga nagtrabaho sa lainlaing call center companies diha sa IT Park.

Human nga dunay call center agent nga gitulis ug gipatay samtang nag-atang og kasakyan didto sa Mabolo, nakahunahuna si Mayor Tomas Osmeña nga serbisyohan sa siyudad ang maong mga call center agents.

Gidestinohan sila og mga bus nga kasakyan nila paingon sa ilang lugar human sa duty, ug gikan sa ilang lugar paingon sa ilang trabahoan.

Apan dunay gi-designate nga mga bus stop nga adto ra gyud sila mosakay ug manaug.

Dinhi ko nga wala makagusto. Pananglit gikan sa IT Park, ang unang bus stop anha sa JY Square. Unya, ang bus mosubay sa Gorordo Avenue, Escario Street ug ang sunod nga bus stop adto na sa Kapitolyo.

Sa ato pa, ang mga gustong manaug diha sa Kamputhaw dapit sa Escario, molakaw pa diay sila pagbalik? Uy, dili ni husto sir.