EDITORYAL - May nabulahan ba?

Pagus-os sa presyo sa lana angay na bang ikalipay o dili? Mao kini ang  kalagmitang pangutana  sa mga yanong tawo nga naapektahan na og maayo sa presyo sa mga palaliton karong mga panahona.

Gipahibalo nga adunay ipatumang pagubos sa presyo gumikan sa mga kalihokan sa kalibotanong merkado nga diin misaka ang produksyon apan miubos ang demand.

Apan hangtud pila kaha ang pagubos sa presyo nga kagahapong adlawa mokantidad paman og P52 ngadto sa P53 ang matag litro ang gasolina sa pipila ka mga gasolinahan.

Maayo unta kon unsa kaabtik mopasaka og presyo ang mga gasolinahan kon may oil price increase mao usab sila kaabtik mopaubos sa presyo.

Ang ilang rason mao nga ‘old stock’ pa ang ilang gibaligya  ug kinahanglan pang ipahurot ayha pa mapatuman ang bag-ong pagubos sa presyo.

Namatikdan man gud nga adunay ubang mga gasolinahan nga nipaubos na sa presyo apan aduna say uban nga wala tungod sa maong rason.

Apan kinsa man kaha o unsaon man kaha pagkahibalo sa katawhan kon nagtug-an sa tinuod ang maong mga negosyante?

Ang paglangay sulod sa pipila ka oras pagpaubos sa presyo sa lana dako na kaayo para sa mga ordinaryong motorista.

Diha usab sa kamerkadohan, dili dayon mabatyagan sa mga konsumidor ang pagubos sa presyo sa mga palaliton tungod gihapon sa maong rason. Mao nga pirme nalang maabtan sa pagbalik og saka sa presyo sa lana wala gyud intawon matilawi sa mga tawo ang pagus-os sa presyo sa ilang mga palaliton.

Duna bay ahensya ang gobiyerno nga paspas mo-enforce sa mga trade laws  aron sa ingon makatagamtam ang katawhan sa kaayohan aning oil price rollback?

Kay sa pagkakaron, ang  pirmeng madungog sa mga balita nga gibuhat sa mga ahensya sa gobiyerno  pulos ra man “price monitoring” ug wala gyud sila kasakop aning mga abusadong negosyante.