Listening is the beginning of understanding

May FM station kanhi nga nagustoan kaayo ni Fr. Manuel ‘Maning’ Tan, Team Moderator sa Team of Pastors sa Guadalupe Parish Church, kinsa misingit niini sa iyang homiliya.

“Nahinumdom mo niadtong FM Station DYBU? Nindot ang maong estasyon kay aduna gyud silay isingit nga panultihon matag karon ug unya diha sa ilang pagpanibya nga undanon sama sa. Listening is the Beginning of Understanding.” Niya pa ngadto nanimba.

Tingali, naobserbaran sa pari nga imbes maminaw sa mga pulong sa Diyos ang nanimbahay, nakigtabi hinuon sa iyang tupad. O kondili, nagtan-aw man tuod sa pari samtang nagsangyaw sa Maayong Balita sa kaluwasan, apan ang hunahuna niini milupad sa halayong kapunawpunawan.

Hinungdan, nga ini’g ingon sa pari nga: ‘Ang ebanghelyo sa Ginoo’, di gyud katubag og: ‘Daygon Ikaw, oh Kristo!’ Kay wala man maminaw. Nalimot ang tawo nga ang pagpaminaw usa ka buhat nga nagsimbolo sa dakong gugma ug respeto sa binuhat nga atong gimahal.

Sulod sa usa ka tuig, hasta kapila balikbalika sa pari ang pagsangyaw sa mga ebanghelyo panahon sa Liturhiya. Mga pulong sa Ginoo ang manggawas sa iyang baba nga giniyahan sa gahom sa Espiritu Santo. Nga sa ato pa, ning aktoha, dili pari ang nakig-estorya nato. Ang Ginoo mismo.

Busa, angay gyud  paminawon. Buksan ang  mga dalunggan ug tipigan sa atong kasingkasing ang balaanong hubad sa Iyang mga pasumbingay kay kini mao ang matin-aw’ng kahayag nga Iyang gibanwag sa atong pagpakabuhi ning kalibotan aron magiyahan tang tanang makasasala pagsubay sa matarong dalan paingon sa Langit.

Apan subo palandungon, nga halos sa tanang adlaw, may magpinatyanay. Polis batok kanhi polis. Illegal drugs pushers versus riding-in-tandem. Amahan ug anak nagtinigbasaay. Ug daghan pang dugoong hitabo nga ning nagkamoderno tang panahon ingon sa gihimo na lang nga kalingawan sa mga kriminal.

Nagpaila lang kini nga daghan nang tawo ang dili maminaw sa mga pulong sa Ginoo. Daghan na ang dili manimba. Ug kon manimba man ugaling, dili mamati sa Iyang mga wali. Kay kon kaantigo lang silang maminaw, segurado gayod, nga mapugngan unta ang ilang pagkahisalaag.

Ngano? Tungod kay matod pa ni Fr. Tan ug sa DYBU: “Listening is the beginning of understanding.”