Kaso ug VAT

Misapasaka na og kaso ang mga biktima sa dakong landslide didto sa Dakbayan sa Naga kaniadtong Septiyembre. Subra sa P4 bilyones ang ilang gipangayo gikan sa usa ka quarry company, kagamhanan sa maong siyudad ug sa lalawigan sa Sugbo ug sa Mines and Geosciences Bureau-7.

Mokabat ngadto sa 36 ka biktima sa landslide, usa ka non-governmental organization ug usa ka concerned citizen ang reklamante sa maong kaso. Kahinumdoman nga 77 ka tawo ang namatay sa maong landslide ug aduna pay natabunan sa yuta nga wala pa igkita hangtud karon.

Hinuon nakaiskor og unang kadaugan ang mga reklamantre. Kini sa dihang mipagawas ang Regional Trial Court og temporary environmental protection order alang sa Apo Land and Quarry Corporation paghunong sa ilang operasyon sulod sa 72 oras.

Apan, sa akong nakita, mora’g hangak alang sa mga reklamante ang pagsustiner alang sa daling desisyon sa kaso. Kini tungod kay makapaabot kita nga gamiton usab sa mga respondents ang tanan aron nga makakuha og pabor nga desisyon.

Kay atoa na man sa korte ang kaso, atong lamang paaboton ang desisyon sa huwis. Makalaum kita nga mopagawas kini og patas nga desisyon.

* * *

Tungod lagi sa grabe nga pagtaas sa mga presyo sa palaliton, dako akong uyon niining proposal ni Ilocos Norte Governor Imee Marcos alang sa kagamhanan pagsuspende sa value-added tax o VAT sulod sa usa ka tuig. Sa sugyot ni Marcos, labing maayo una kuno nga ikanselar ang VAT sa mga basic food commodities, lana ug elektrisidad aron nga masupo ang nagkataas nga inflation nga maoy naghatag og kalbaryo sa katawhang Pilipino karon.

Si Marcos, kinsa usa sa mga nag-unang kandidato pagkasenador sa eleksiyon sa Mayo, miawhag sa gobiyerno sa paghingusog usab sa koleksiyon sa income tax aron pagkuha og dakong pundo nga sarang makapuli sa VAT.

Maayo kini nga sugyot. Ang usa ka tuig nga suspensiyon sa VAT dako na kaayo og ikatabang sa katawhan, ilabina sa mga kabus. Kini tungod kay mokunhod ang presyo sa mga nag-unang palaliton, ilabina sa mga pagkaon.

Insakto si Marcos sa iyang opinyon nga dili kita angay magpaabot kon kanus-a mohagba ang presyo sa lana sa global market. Grabe na ang pagtaas  sa mga presyo sa palaliton ug angay lamang nga mangita og paagi ang gobiyerno batok niini.