Mga batang sinalikway

Karong nagsingabot nga Pasko daghan na sab kaayo kitang makita nga mga bata nga gasaoysaoy sa kadalanan manaygon sa mga sakyanan bugti sa gamay’ng sinsilyo sa kalooy sa mga motorista.

Delikado kaayo ang ilang kahimtang tungod kay gamayng sipyat lang madisgrasya gyud.

Ambot lang kon dunay pagtugot sila sa ilang mga ginikanan nga maglaroylaroy ang mga anak aron mamasko sa mga motorista. Naay uban siguro nga molighot gyud aron makakwarta apan naa usay uban diha nga ma pasko man o dili magpangayoan gyud og kwarta o pagkaon alang sa ilang survival. Mismo ang ilang mga ginikanan ang miabandonar kanila og wala usab sila amomaha sa ilang mga kadugo.

Aron mo-survive mapugos ang mga batang sinalikway sa pagpakalig-on nga moabot na gani sa punto nga magpakabarato na sila tungod sa ilang kasinatian.

Usa sa ka batan-on akong nahinabi kinsa nagtubo sa kadalanan human mailo sa iyang mga ginikanan ug wala na usab siya atimana sa iyang mga paryente.

Sa sinugdanan maulaw pa kuno siya mangayo og pagkaon, dili pud kuno siya magpakilimos sa kalooy apan iyang nahunahuna nga kon dili niya kini himoon malunosan gyud siya sa kagutom.

Wala siyay laing katambayayong kon dili ang iyang kaugalingon aron mabuhi. Sa sinugdanan, ang mga bakery nga pangayoan niya og pan bahaw maluoy pa kuno apan sa kadugayan mapul-an na, abugon na siya.

Sakit kuno kaayo ang iyang gibati kay mas ubos pa kuno sa iro ang pagtan-aw kaniya sa ubang mga tawo kinsa giluod kaniya kay bulingit man kaayo siya.

Kada gabii igo nalang siya mag imagine sa kainit sa gakos kaniya sa iyang inahan dihang buhi pa kini aron matambalan ang katugnaw sa semento nga iyang gihigdaan daplin sa karsada kauban ang ubang mga batang sinalikway.

Ang mas nakapatukbil sa galamhan ang iyang pamahayag nga kon mopatigbabaw pa lang kuno ang gugma sa mga tawo nga mohatag og pagpangga sa sama kanila, wala untay mga bata nga maglatagaw sa kadalanan nga nagkutoy ang tiyan sa kagutom.

Ang batan-on naka survive human nasagop sa usa ka institusyon diin siya gipaeskwela hangtod nga nakahuman.

Karon usa na siya sa nagatiman sa mga batang sinalikway diin siya ang nahimong sumbanan sa kabataan.

Sa mga tawo nga duolon sa mga batang libudsuroy, ayaw sila aboga hinoon hatagan sila bisan pahiyom man lang kong wala gyuy makuot sa imong bulsa kay dako na kaayo alang kanila kon ipabati nato nga tawo usab sila.