Way solo’ng kredito

Nagpabiling labing datu ang Sugbo sa tanang 81 ka mga lalawigan sa nasud pinaagi sa kinatibuk-ang kantidad sa bahandi niini nga mobalor og P34.14 bilyones.

Kini sigun sa Financial Audit Report sa Commission On Audit niadtong tuig 2017. Ang Dakbayan sa Sugbo usab anaa sa ika-upat nga labing datu nga dakbayan sa nasud pinaagi sa iyang total assets nga mobalor og P33.86 bilyones.

Ang current assets sa lalawigan mobalor og P5.7 billion samtang ang non-current assets niini mokantidad og P28.37 bilyones. Ang current assets nagkahulogan og cash equivalent nga mamahimo dayong magasto sulod sa usa ka tuig. Pananglitan kwarta sa bangko ug mga short-term investments sa lalawigan. Samtang ang non-current assets naglakip ni sa mga ekipo, real properties, ug mga long term investments.

Ang labing dako nga kantidad sa mga katigayonan sa lalawigan mao ang non-current, buot ipasabot nga sagad niini real properties sama sa yuta ug mga ekipo. Kun imong tan-awon kining maong mga katigayonan natigom sa probinsiya sulod sa kapin sa 400 ka tuig na ug way bisan usa ka administrasyon ang makapangangkon og solo nga kredito niini.

Apan tingali dunay mga nanlabay nga mga gobernador nga dako og gikatampo sa pagsulbong sa katigayonan sa Sugbo. Pipila nila mao sila si kanhi gobernador Eduardo Gullas, Lito Osmeña, Pablo Garcia, ug Gwen Garcia.

Sa  panahon ni Osmeña nahimugso ang gitawag og “Ceboom” tungod sa grabe nga paglambo sa ekonomiya. Sa panahon ni kanhi gobernador Pabling Garcia nilubo og maayo ang surplus sa probinsiya ug kini gipadayon sa iyang anak nga si Gwen.

Sa ilang panahon wala igdungog ang lalawigan nga namaligya og mga katigayonan ug way mga kabtangan nga gipasagdan.

Kun unsa man ang kahimtang sa panudlanan sa lalawigan sa kasamtangan produkto ni sa paningkamot sa tanang nangagi nga administrasyon.

Ug alang nako dili ‘ta angayang malipay ug makontento nga adunahan ang atong probinsiya labi pa kun daghan pa sa mga kabus ang giuhaw sa serbisyo sa gobiyerno.

Angayang hinumduman sa atong lokal nga mga opisyal nga sila gipili sa katawhan dili aron pagtigom og bahandi kondili aron pagpaabot sa serbisyo ngadto sa labing nagkinahanglan.