Ngano maayo magtakilid sa wala kon matulog (1)

Lainlaing mga tawo, nga lainlain sab ang posisyon nga sa ilang kondisyon komportable ug dali ra sila nga makatulog dayon. Adunay posisyon sa pagtulog nga magtakilid, maghapla, maghayang, magtikuko ug uban pa.

Apan kadaghanan tingali, wala masayud sa husto o angay nga posisyon sa pagtulog nga makahimsog. Mao nga dili nato mabasol nga bisag unsay na lay naandang gisagop nga posisyon diin mahimong komportable sila niini.

Bisan tuod gikinahanglan sa lawas nga makatulog kita’g maayo, apan ato sab hatagan og konsiderasyon, nga sa sud sa lawas, padayon adunay nagtrabaho nga naglimpyo sa kasingkasing, nagtunaw sa mga kinaon ug pagbasura sa mga hugaw, aron iandam nga kondisyon kita inigbangon.

Ug tungod ini, dako’g matabang ang posisyon nga magtakilid sa wala kon matulog na kita. Ania, atong tukion ang mga mosunod nga katarungan.

* Mas mahamugaway ang agianan o ang ‘drainage sa ‘lymphatic system – Ang dakung tahas sa ‘lymphatic system’ mao ang pagpagawas sa nagkalainlaing mga toksins. Kay kon magpundo ni sa lawas, daghang motubo nga bukol (cysts), butoy o hubag ug uban pang mga toksik, nga kadugayan mopahuyang sa atong imyun, nga momugnag daghang problema sa lawas.

Gituohan sa mga eksperto nga ang gawsanan sa ‘lymphatic’ nga mao ang ‘thoracic duct’, naa ni nahimutang sa wala nga kilid sa lawas, mao nga maayong motakilid sa wala kon matulog na ta. Aron makabuylo nga igawas ang mga toksik.

Gawas pa niini, ang sistema sa lymphatic, mao say gitahasan sa pagkolekta sa mga protina nga nangikyas gikan sa mga selyula. Ang pagtakilid sa wala, maoy libre nga madalag balik ang nakolektang protina sa mga distinasyon ini. Busa,  bentaha nga makatabang kita sa lawas, samtang matulog nga magtakilid sa wala.