Maayo kay wala mopahit

Pabiling tak-om ang baba ni Mayor Tomas Osmeña niining Dakbayan sa Sugbo sa dabodabo ni Presidente Rodrigo Duterte kaniya.

Hangtud karon, wala mitingog ang mayor sa ikaduha nga bira sa presidente kaniya.

Sa ulahi nga pagbisita ni Duterte sa Sugbo, iya na usab nga gisaaran nga tamparoson si Osmeña.

Kini kon ini’g magkita kuno sila unya dili siya kumbinsido sa ekplinasyon ni Osmeña sa mga pasangil batok sa mayor gikan sa kapolisan.

Nasuko si Duterte sa pagsulong kuno ni Osmeña sa usa ka estasyonan sa pulis aron pagsalbar sa tulo ka dinakpan kinsa nag-refill og mga butane canisters. Niakusar ang presidente nga grabe kuno ang paghawodhawod ni Osmeña sa Sugbo.

Apan insakto lamang ang lakang ni Osmeña pagtak-om sa iyang baba.  Kay wala gyud siyay dag-anan kun mosuki usab siya sa mga pahit sa presidente kaniya.

Mao nang mas maayo nga mohilum una siya kay basin unya kon matinuod ang panganti ni Duterte.

Hinuon mipasaka na og kaso ang kapolisan batok kang Osmeña mahitungod niadtong insidente sa butane. Naabot kini sa presidente hinungdan nga mibahad na usab kini kang Osmeña sa ikaduha ka higayon.

Gani, sa iyang pagduaw dinhi, giorderan usab sa presidente ang Department of Interior and Local Government sa pagpasaka og kaso batok kang Osmeña. Ug makapaabot kita nga tinud-on gayud sa maong departamento ang pagduso niini.

Usa lamang kini sa mga kaso nga gibapak ngadto ni Osmeña sukad sa iyang paglingkod sa katungdanan niadtong 2016.

Adunay daghan pa siya nga kaso nga giatubang didto sa Office of the Ombudsman ug sa Office of the President. Mobunga kaha kini og suspension sa mayor gikan sa Ombudsman o opisina sa presidente?

Ambot lamang. Ato lamang nga atangan.

Hinuon dili layo kini nga mahitabo, ilabina nga aduna nay bahad ang presidente kaniya.