EDITORYAL - Kaguliyang sa BOC
Daghan ang misaway ug mikwestyon sa lakang ni Pres. Duterte kabahin sa mando niining “military takeover” sa Bureau of Customs tungod sa walay kasulbarang kurapsyon sa maong ahensiya sa gobiyerno.
Ang BOC usa ka sibilyan nga ahensya sa gobiyerno apan aduna usab kini opisina nga daw may pagka-parehas og papel sa law enforcement sama sa ilang intelligence service pagpaniid sa mga smugglers ug uban pa.
Kaniadto pa ang BOC nasentro kanunay sa mga pasangil kabahin sa kurapsyon pinaagi sa smuggling gikan sa bugas, asukar, harina, lana, mga luhong sakyanan, ug uban pa.
Ug niining uwahi, gibasol ang BOC nga nalutsan o tuyong nipalusot sa bilyon-bilyon ka pesos nga shabu.
Gawas sa kampanya batok sa ilegal nga drugas, apil sa gipanaad ni Duterte ang paghunong sa kurapsyon sa gobiyerno ug karon maoy gitutokan sa pangulo ug gusto niyang ang militar ang ‘modumala.’
Nalatid sa balaod nga dili mahimong idestino ang aktibong sundalo sa usa ka pwesto nga gitagana para sa sibilyan.
Giklaro hinuon sa tigpamaba sa Malacañang ug legal adviser Salvador Panela ug Justice Secretary Menardo Guevarra nga di militarisasyon sa BOC ang gipasabot sa presidente.
Ang maong kamandoan ni Duterte gitinamban pud pagsabot sa uban nga daw wala na maanad sa estilo sa pangulo. Daghan nang pamahayag ang pangulo nga sa unang pagtan-aw nakalapas sa balaod ug makapaisa og kilay apan kon klaruhon ang unod dili diay mao sa gikabalak-an.
Matud pa nga ‘supporting role’ lang ang papel sa AFP nga samang gamiton silang “panghudlat” sa mga hiwing opisyales sa maong ahensya.
Ngil-ad man paminawon apan kinahanglang buhaton ni Duterte ang tanan aron sulbaron ang problema. Ang mga ahensya nga gitahasan mao nay bahala paghimo niini pinasubay sa balaod.
Kay sa pagkakaron, ang bag-ong natudlong Commissioner sa BOC nga retiradong heneral nga si Rey Leonardo Guerrero nagkinahanglan gyud og kasaligang mga tawo pagpuhag sa kurapsyon sa maong ahensya.
- Latest