Halloween party dakong negosyo

Sa Adlaw sa mga Minatay dili lang mga kandila ug bulak ang ipang-display sa mga tindahan.  Hasta mga sinina ug nawong sa kalabira, ipangladlad sab. Unsaon, ang Pinoy nga nailado na sa pagka masunodsunoron man sab sa Amerika. Kamao na pod mag-Halloween Party. Gani, adunay mga kompaniya nga ilang empleyado gi-require nga pasul-obog Halloween attire samtang nag-alagad sa ilang mga kliyente diha sa ilang trabahoan. Gakampat lang gud ang agi sa make-up. Mura gyug ungo!

Gikan sa mga maskara nga puro makahahadlok tan-awon,  hangtod na sa mga gamitonong isul-ob, diin  moresulta ang panagway nga mahisama ni Satanas ug sa iyang mga hinanib, maoy halinonon kaayo niining panahona. Gani, may mga grupo man nga morenta og Haunted House, o mopa-book og function room sa mga hotel, bahala nag medyo mahal ang bayranan, basta mahimo lang mabulokon ug puno sa kasadya’g katawa ang ilang Halloowen Party.

Sa laktod, ning maong adlaw nga gigahin sa Simbahang Katoliko ang pag-ampo aron magmalipayon unta ang kalag sa mga minatay, ang mga batan-ong buhi na hinuoy mi-enjoy so much, kinsa ambot...pipila lang kaha kanila ang nakatultol og simbahan matag Domingo, o bisag ning adlawa lang unta?

Sa tinuoray lang, ang Halloween Party gikaguol sa mga kalag sa Purgatoryo, apan gikalipay sa mga negosyante kay naghatag man nig dugang income sa ilang panudlanan. Sa miaging Lunes lang, dihang misulod kog restawran diha sa may Andres Abellana Street sa Guadalupe, maoy misugat sa akong panan-aw ang mga  estatuwang lungon, minatay ug kalaberang gipang-adorno sa palibot. 

May greetings pang giplastar: “Happy Halloween” kuno! Haskang daghana sa nangaon.  Puno gud ilang parkingan sa mga sakyanan. Hasta, ilang function room okupado. Nanghatag pod og Halloween T-shirt ang maong iladong kan-anan. Pero gipili lang ang gihatagan – kadtong kustomer nga ang nawong namiyahok, murag kalabera!

Kini nagmatuod lang, nga ang Halloween Party dinhi sa ato, gihingusgan gyud pag-promote sa mga negosyante. Buhat nga nagtudlo sa mga batan-on sa paghimo ning maong adlaw nga usa ka kalingawan, imbes ibalaan. Ug gikahingawa kaayo kini sa simbahan. Sanglit, hinayhinay kining nagtabon sa matuod nga kahulogan nganong gisaulog ang Adlaw sa mga Minatay kada Nobiyembre 1 ug 2.