Bastos drivers sa flyover road

Wala nay dalan sa Dakbayan sa Sugbo nga dili trapik.

Bumper to bumper ra ba gyud.

Ang tukmang sukod sa KEEP DISTANCE,  wala na masunod.

Bisag “caution to stop” na ang traffic light, bisag naglaray pa ang nag-urong nga behikulo kang kansang mga ligid nagtunob pa sa katungang bahin sa junction box, mosulpot gihapon ang mga nagsunod nga sakyanan nga dili na unta dapat.

Resulta, ang tungang dapit sa junction box  nga agianan sa molabang na untang behikulo kay ila nang turno, dili na hinuon makalusot.

Dili ba gipanghigusgan na man nila og panakop ang mga motoristang mo-counterflow ug maabtang maghunong sulod sa junction box agig tuman sa mando ni Mayor Tommy?

Nganong nipalyar man kini? Ang naghinangat ba nga mid-term elections ang hinungdan?

Nindot unta, nga seryusohon pirme ang pag-implementar ning balaura sa walay pagpili og panahon.

Kuan man gud, ang atong karsada mao lang gihapon ang gidak-on sulod sa pipila na ka dekada, samtang ang mga sakyanan, gikan sa motorsiklo, taxi, PUJ ngadto sa ten-wheeler trucks, labihan nang daghana.

Samot na kanang tiilan sa flyover sa Ayala, grabe ka bastos ang mga drayber sa PUJ ug taxi nga magbiyahean gikan sa Talamban paingon sa Ayala. Gikan sa TESDA magsugod nag kataas ang linya sa naghunong nga sakyanan.

Lakip na diha tungod sa Grand Convention Center patighulog sa ubos kilid sa right side  sa flyover.

Ako mismo, pirmeng moapil sa mga buotang drayber nga mo-single file paglaray habig sa tuo paingon sa ubos.

Pastilan, maghaguros bitaw nang mga PUJ nga moagi anha sa tunga paingon sa flyover.

Unya manghunong duol sa tiilan ug walay kaikog mosingit sa mga natanggong behikulo nga kaganina ra intawong nag-antos sa katrapik.

Resulta, dili na  hinuon makaagi ang mga sakyanan paingon sa itaas sa flyover kay gialihan man sa mga nagbabag  nga PUJ.

Kini bayang gibuhat sa mga badlongon, ma-charge baya ni silag “driving in a wrong lane.” 

Pero sukad, wa gyud koy nakit-ang gidakop sa traffic enforcer.

Kay wala gyuy makitang enforcer nga magbantay ning dapita.

Hangyo lang. Tsip, please lang, ato ni silang panakpon, bi! Abusado na man kaayo ni sila, uy!