Garbuso nga mayor

Daghang nilansar sa lainlaing katungdanan sa kagamhanan ang gipasakaan og kaso sa Commission on Elections (Comelec) kay gusto nga ipakanselar ang ilang mga giduso nga Certificates of Candidacy.

Naglakip kini kanila ni kanhi gobernador Gwen Garcia ug sa iyang igsuon nga si Pablo John Garcia, unya sila sab si re-electionist Cebu City Councilors Sisinio Andales ug Alvin Arcilla.

Ang argumento sa nireklamo batok ni Gwen mao nga wala siya magtug-an sa tinuod kay bisa’g nakonbikto kini og kaso, sa iyang certificate of candidacy niingon nga wala.

Ang katarungan sab ni Gwen mao nga ang kaso nga siya nakonbikto, pending pa kay iya man nga giapelar.

Sa bahin ni Pablo John, ang nireklamo nagkanayon nga si PJ walay katungod nga magpapili pagka-kongresista sa third district, kay nagpabilin pa siya nga molupyo sa Dumanjug nga kabahin sa seventh district.

Unya, sila si Konsehal Andales ug Arcilla, gireklamo usab kay bisan og ikatulo na nila karon nga termino pagka-konsehal sa Dakbayan sa Sugbo, apan nilansar gihapon sila pagbalik.

Matud sa duha ka konsehal nga wala makompleto ang ilang tulo ka termino kay sa ikaduha nila nga term, gisuspenso sila tungod sa pagdawat og P20 mil nga calamity assistance gikan sa City Hall bisan og wala sila nabiktima sa linog ug bagyo niadtong 2013.

Buyno, atong paaboton kon unsay sangpotan niining maong mga reklamo.

* * *

Kalisud ba diay kontakon niining mayor sa Dakbayan sa Lapu-Lapu nga si Paz Radaza. Mas sayon pa man kontakon si Mayor Tomas Osmeña nga nipublikar sa publiko sa iyang contact numbers sa cellphone.

Si Radaza, dili gyud motubag kon tawgon ug dili mo-reply kon padad-an og text message, bisan pa og nagpaila ka pa.

Nagpareho lang diay ni siya ug sa iyang bana nga kaniadto dihang mao pa ang mayor, dili usab magpa-interview.

Bisan ang iyang mga staff, mahadlok usab nga mohatag sa iyang contact numbers.

Nakakuha ko sa cell number ni Mayor Radaza gikan sa akong mga amigo, apan wala gyud nitubag.

Unsa kaha ang gikahadlokan ni Mayor Paz nga dili man siya motubag og pangutana gikan sa ubang media, gawas sa iyang mga kaila?

Garbuso lang gyud kaha siya? Wala pa man ko’y isyu batok ni Radaza, lahi ra nga isyu ang buot unta nako pakomentaryuhan kaniya.

Sus, mao ba kini ang tawo nga gustong mahimong kongresista?

Pastilan, kinahanglang dili kamo magpalabi sa inyong pagka-garbuso nga dili motubag sa pangutana. Kon busy ka, siyaro, dili ka gyud maka-reply?

Pastilan, ang mga suod sab ni Radaza, magkurog ug dili mohatag bisan sa iyang contact numbers.