Dili angay ikumpiyansa

Adunay usa ka sitio sa Barangay Buhisan sa Dakbayan sa Sugbo diin adunay mga liki sa yuta nga nakapaalarma karon sa otoridad tungod kay delikado kini sa pagdalihi sa yuta.

Ug gisugyot karon ang pagbakwit sa mga residente sa maong lugar.

Apan ang problema mao nga nagdumili ang ubang molupyo pagbiya sa ilang panimalay.

Dili kuno peligro sa landslide ang maong lugar tungod kay walay quarry operations sa ibabaw niadtong yuta nga adunay mga cracks.

Matud sa usa ka residente sa maong lugar, lahi kuno ang sitwasyon sa ilang sitio sa nahitabo didto sa duha ka barangay sa siyudad sa Naga diin ang pagdahili sa yuta naggumikan kuno sa quarry operations sa usa ka kompanya.

Matud pa sa mga report, ang daghang liki sa yuta resulta sa dakong linog nga mitay-og sa Sugbo ug Central VIsayas kaniadtong 2013.

Mao usab kini ang resulta sa pakisusi sa mga ahensiya sa kagamhanan

Apan unsa ka siguro nga dili mahitabo didto sa Buhisan ang nahitabo nga landslide didto sa Dakbayan sa Naga?

Kana kay adunay mga liki sa yuta nagpasabot lamang nga dili gayud stable ang sitwasyon niini.

Hinuon dili eksperto ang mga molupyo sa maong lugar sa Buhisan nga nahibalo na man silang dili gayud modahili ang yuta sa ilang lugar bisan pa sa mga liki niini. Basin kon kumpiyansa lamang sala niini.

Dili nato matag-an ang panahon.

Daan nang mipahibalo ang Mines and Geosciences Bureau sa Department of Environment and Natural Resources nga delikado ang mao nga lugar tungod sa mga cracks sa yuta.

Gani misugyot man kini og evacuation sa mga molupyo.

Apan wala mahinayon ang evacuation tungod lagi sa ka kulang sa kooperasyon ug ka gahi sa ulo sa mga residente sa maong lugar paglalin ngadto sa libre nga lugar.

Mao usab kini ang gikasagmuyo mismo sa mga opisyal sa barangay.

Kay nagdumili man ang mga residente sa pagbakwit, angay lamang nga ipatuman sa kagamhanan ang forced evacuation.

Dili kita makapaabot pa nga adunay dakong trahedya nga mosakdap sa maong lugar.

Dili angay mokompiyansa sa sitwasyon didto sa Buhisan. Kay kon simbako nga mosiak gayud ang maong yuta unya modahili ngadto sa kabalayan sa ubos ug motabon og daghang kinabuhi, nan lain na usab kini nga trahedya.