Dili maayong mag-away

Trabaho sa mga sakop sa Land Transportation Office (LTO) ang pagsiguro nga ang mga drayber motuman sa balaod sa tukma nga pagmaneho og sakyanan diha sa atong mga karsada.

Susama ra kini sa tumong sa mga traffic enforcers sa lainlaing Local Government Units (LGU) mao nga dili gyud unta angay nga sila magkontra na hinoon, ug hinoon angay pa gani nga magtinabangay.

Dili gyud angay nga ang LTO maoy mangunay pagkuwestiyon kon gihulagway nila nga ilegal ang ordinansa nga gihimo sa Cebu City Council nga magtugot sa mga traffic enforcers pagsakmit sa lisensya sa mga drayber nga walay Temporary Operators Permit (TOP).

Pasagdi nga dunay motorista nga maoy mopasaka og kaso didto sa korte aron kuwestiyonon ang ordinansa sa dakbayan nga gipasar sa City Council.

Wala malilong nako ang panag-away nila ni Mayor Tomas Osmeña ug ni LTO-7 Regional Director Victor Caindec.

Pareho silang duha nga akong mga higala.

Para ni higalang Caindec, dili ka ba diay malipay nga dili na mo-counterflow ang mga drayber sa pagmaneho nila sa ilang mga sakyanan?

Sa matag higayon nga makakita ko og motorista nga mo-counterflow, maglagot gyud ko kay abuso kaayo kini kay gusto nila nga mabentahaan ang ubang motorista.

Unsaon, naay mga LTO road law enforcers  apan panagsa ka ra makakita nga mag-operation.

Nasabtan sab nako ang baruganan sa LTO nga ang mga “regular government workers” ra nga dunay plantilla ang maisyuhan nila og TOP.

Ang sipyat sab ni Mayor Osme?a kay wala man gyud niya himoa nga regular ang daghang traffic enforcers nga miabot na gani ang uban og 20 ka tuig sa pagserbisyo sa dakbayan.

Kon gihimo pa sila nga regular, kaisyuhan unta sila og TOP sa LTO aron makasakmit og lisensya sa mga drayber.

Unta, ikonsiderar kini nga isyu ni Mayor Osmeña.

Apan usbon ko, unta likayan lang gyud unta sa LTO ang pagsugnib og dugang agipo nga makapasilaob pagsamot sa walay maayong pagsinabtanay nila ni Mayor Osmeña ug Director Caindec.

Pasagdi lang nga ang mga madakpang motorista maoy mopasaka og kaso batok sa dakbayan ug dili kay kamo gyud sa LTO ang mohimo niini.

* * *

Nasayod man gyud ko ngano nga dali ra kaayong misilaob ang panagsungi nila ni Caindec ug Osmeña. Tungod kini kay suod sila si Caindec ug si Presidential Assistant for Visayas nga si Mike Dino, nga kontra sa mayor.

Kini ang rason nga maglisud sab si Caindec sa pakigsuod kang Osmeña.

Dihang may mikadlit og pusporo, misilaob dayon ang panagsungi nila ni Osme?a ug Caindec. Pero,  pagsinabtanay mo uy.