Ibutyag gyud Director Sinas

Husto si kanhi mayor Michael Rama nga angay’ng ibutyag gyud sa kapolisan kon kinsa ang mga drug lords nga misuporta og mga kandidato, ug labaw sa tanan, ang mga kandidato nga hingtungdan.

Kini aron nga ang katawhan masayod niini ug dili nila botohan inig-abot na sa adlaw sa eleksiyon. Dili man gud maayo nga kutob ra sa sulti ang himoon sa kapolisan, angay’ng suportahan nila kini og ebidensya.

Nasayod ko nga ang gibasehan sa kapolisan sa ilang pag-ingon nga adunay mga drug lord nga misuporta og mga tawo nga nagpapili og katungdanan sa kagamhanan, mao nga kining mga kandidato, suod sa mga drug lord.

Atong awhagon si Police Regional Director Debold Sinas nga iyang ibulgar ang ngalan niining maong mga kandidato.

* * *

Nihapit ko kadiyot sa gihimong operations sa Task Force Alpha ug CITOM didto sa Echavez Street kaniadtong Miyerkules sa gabii ug nasuta nako nga daghan gihapon kaayo ang mga sakyanan nga mo-counterflow.

Kapin sa 30 ka motorsiklo ug usa ka kotse ang na-impound. Ang driver sa awto, nag-hazard lights pa nga mi-counterflow. Ang drayber mirason nga naa ra kuno sa unahan ang iyang balay, apan taga Lapu-Lapu City diay.

Ang mga nangadakpan, pulos gyud nanghangyo nga dili na lang unta i-impound ang ilang sakyanan. Mao na diha, abusado kaayo unya kusog kaayong manghangyo.

Arang-arang na lang kadtong tag-iya sa awto kay nakasabot siya nga sayop gyud ang iyang gihimo ug mao pa ang mihatod sa iyang sakyanan didto sa opisina sa CITOM. Ayaw gyud mo pag-abuso. Kini hinoon nga gihimo ni Mayor Tomas Osme?a nga pagpa-impound sa mga sakyanan nga masakpang mo-counterflow, giimbestigar kini karon sa Office of the President tungod sa reklamo ni LTO-7 director Vic Caindec.

Gihimo ni Caindec ang reklamo kay kontra man sila si Mayor Osme?a, apan para kanako, dili na lang unta kini angay’ng himoon ni Caindec kay pagdisiplina man sa mga driver ang gihimo sa mayor.

Kon dunay moreklamo nga mga motorista, walay problema, apan dili gyud unta angay nga si Caindec maoy mangunay sa pagreklamo kay ang tumong sa mayor mao ang pagpahapsay sa trapiko ug angay’ng mosuporta niini ang LTO.

* * *

Karon, gipirmahan na ni Mayor Osme?a ang ordinansa nga magtugot sa mga traffic enforcer sa CITOM nga makasakmit og lisensya.

Ang LTO nangangkon nga kini ilegal kay sila ra maoy makasakmit og lisensya base sa balaod.

Ang mga opisyal sa dakbayan miingon nga motuman lang sila kon ang hukmanan moingon nga ang pagahimoon sa CITOM usa ka ilegal. Atong paabuton ang kalamboan niini.