Family affair lang gihapon

Mao lang gyud gihapon, ang politika sa atong nasud, gidominar lang gihapon sa mga pamilya ug mga dinastiya. Family affair lang gihapon. Matud pa. “all in the family in 2019.”

Of course, wa kitay mahimo batok niini tungod kay mao kini ang gusto sa mga Filipino … nga   ang atong pangagamhanan dumalahon lamang sa mga political dynasties.

Maoy hinungdan nga kon ang usa ka magtiayon magdungan paglansar, ato gyud silang botaran kay dili kita buot maadto sa laing mga kamot ang pagdumala sa pangagamhanan.

Gumikan niini misanay pag-ayo ang mga political dynasties sa tibuok nasud. Nakaayo ba kini sa atong nasud?

Ini’g katapos sa termino sa usa ka incumbent, pulihan kini sa laing sakop sa pamilya. Pananglitan, ang last termer nga amahan nga mayor, pulihan either sa asawa o anak ang pagka-mayor. Pastilan!

Apan mao kini ang gusto sa katawhan.

Samtang mao kini ang sitwasyon sa pipila ka dapit sa nasud, sa ubang mga dapit usab, adunay mga sakop sa banay nga nag-unay. Sa dakbayan sa Ilagan pananglitan, ang mag-agaw nga Dy nagkaatbang pagka-gobernador sa Isabela, ug sa ubang mga posisyon sa lalawigan. Mao ni ang giingon nga  Family feud mi-spill out ngadto sa politika. Apan, familya lang gihapon.

Sa Maguindanao, ang mga Mangudadatu giingon nga nagkaatbang sa politika. Ingon man sa Iloilo nag-unay usab ang Garin family.

Mao usab kini ang sitwasyon sa ubang dapit sa nasud. Apan, sa ako nang giingon, maunsa man, family affair lang gihapon.  Mao kini ang reyalidad sa pamolitika sa atong nasud.

Ug usa kini sa mga hinungdan ngano nga  ang sugyot pag-ban o pagdili na sa mga political dynasties ubos sa bag-o unyang Federal Constitution, dili madayon.

Dili mosugot niini ang atong mga magbabalaud for obvious reason.

Laing reality sa matang sa pamolitika sa atong nasud, mao kining kinaiya sa atong mga politiko pagbalibali og partido. Matud pa, ang pagpasakop sa usa ka political party, walay bili tungod kay ang mga partido walay klaro nga prinsipyo, mga beliefs and objectives nga angay untang  subayon ug panalipdan sa mga sakop niini. Busa sayon-sayunon lang sa atong mga politiko ang pag-ilis-ilis og partido, agad sa party in power.

Matud ni Randy David sa iyang column: “Our politicians feel neither shame nor awkwardness as they merrily move from one political party to another.”

Pastilan! Kanus-a kaha mausab kining maong mga political realities sa atong nasud?

Let  change come this coming election.