Mikakak na si Tomas

Giduso ni Konsehal Dave Tumulak atol sa session sa konseho sa Dakbayan sa Sugbo ang pagpalabang og resolution nga magtugot ni Mayor Tomas Osmeña sa pagsulod og kompromiso sa mga kaso nga gipasaka sa dakbayan batok sa mga kompanya nga mipalit og yuta sa South Road Properties (SRP).

Sa akong pangagpas gisugo ni Mayor Tom si Tumulak aron mahatagan og katumanan ang iyang laraw nga pagpakigkompromiso sa mga kaso nga siya ang nagpasiugda batok sa mga kompanya nga namalit og yuta sa SRP.

Kining maong lakang usa ka pagbaliktad 360 degrees sa unang baruganan sa mayor batok sa mga mamalitay sa luna sa SRP.

Kon makahinumdom pa mo, wa pa gani makalingkod sa pagka mayor human niini pildiha si Mike Rama gisugdan dayon ni Mayor Tom ang pagpabalewala sa kontrata sa palit sa luna sa SRP.

Apan hapit na lang mahuman ang iyang termino wa na tay balita niini hangtod nga gipahinumdoman kita ni Tumulak atol sa session niadtong miaging semana.

Sa akong pagsabot ang resolution nga magtugot ni Mayor Tom sa pagsulod og kompromiso batok sa conglomerate senyales sa iyang pagkakak ug pag-angkon sa kamatuoran nga way basihanan ang iyang pagpabalewala sa kontrata sa yuta sa SRP nga napalit sa SM, Ayala ug Filinvest.

Siguro mipatoo na ang mayor sa tambag sa iyang mga abogado nga bisan asang anggulo wa gayud dag-anan ang dakbayan kon ipadayon niini ang pagpabalewala sa kontrata sa palit sa yuta sa SRP.

Sa akong pangagpas mao ni ang hinungdan nganong makigkompromiso si Mayor Tom. Una, way nakitang basihanan ang iyang mga abogado sa pagpabalewala sa kontrata. Ikaduha, wa gyod mokakak ang conglomerate nga SM, Ayala ug Filinvest sa ilang pagpalit sa yuta sa SRP.

Ang Filinvest miyukbo diay sa Mayor. Ikatulo, funding para sa umaabot nga midterm election.

Mga pangagpas lang ni nako ug mahimong sayop ko niini.