Wa mobayad sa hospital expenses ang nakabangga
Dear Atty. Divine:
Ang akong manghud nga nagmaneho sa iyang motorsiklo nabanggaan og awto. Usa ka estudyante ang nag- drive sa awto ug mi-counterflow kini hinungdan nga naigo ang akong manghud. Nadala sa tambalanan ang akong igsuon og gi-operahan. Ang ginikanan sa nakabangga misaad nga maoy mobayad sa galastuhan sa hospital ug nagpirmahanay sila sa akong mama ug kasabutan. Tungod niini, gi-release sa police ang sakyanan ug ang lisensya sa nakabangga. Last week ang akong manghud nahuman na og opera ug niadtong miaging adlaw migawas na siya sa hospital. Apan ang nakabangga wa motuman sa ilang kasabutan ug wa kini mobayad sa hospital expenses lakip na sa mga tambal. Unsay angayan namo nga buhaton? Daghang salamat.—Jesper
Dear Jesper,
Pasakaan ninyo og kasong criminal or Reckless imprudence resulting to physical injury ang nakabangga sa imong igsuon. Mamahimo kamong magpa-assist sa police alang sa pag-file og kaso sa nakabangga. Kon ma-file na ang kaso sa korte pangayuon sab ninyo ang pagpabayad sa nakabangga og damages lakip na niini ang inyong nabayran sa hospital, mga tambal ug uban pang damages. Mamahimo sab nga di na mo mokuha og private lawyer kay ang fiscal nga naka-assign sa korte nga mo-handle sa inyong kaso maoy mo-prosecute sa nakabangga. Ang mga ebidensya nga dapat ninyong andamon sa pag-file og kaso mao ang police report, hospital bills, mga resibo sa tambal, medical certificate, Affidavit sa victim ug uban pa. Thanks and God bless. — Atty. Divine
Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.
- Latest