EDITORYAL - Social media sa eleksyon

Nagsugod na pagbaha ang mga political posts sa mga social media sites diin ang uban tinuod apan kadaghanan pulos mga bakak ug pagpangdaot sa ubang personalidad nga malagmit ilang kaatbang sa umaabot nga bugnong lugaynon sa sunod tuig. Ang social media gamiton karon sa mga politiko kay kini libre man ug walay kinutoban ang pwedeng maabot nga makabasa.

Samtang adunay limitasyon ang mga kandidato sa gidak-on sa ilang gastuhon sa pangampanya, maglisod ang Comelec pagsubay ug pag-monitor tagsatagsa sa pagpasapasa sa mga political campaigns diha sa social media. Bisan og ilaha kining mabuhat walay balaod nga nagdili pagpangampanya pinaagi sa social media platforms.

Busa ang mga politiko makamao sa social media makapabor gyud kon sila mogamit niini.  Sa nakalabay nga eleksyon niadtong 2016, nalumos ang katawhan sa mga campaign propaganda pabor ug pagpangdaot sa mga politiko diha sa social media. Daghang nakadaog ug nangaparot tungod niini.

Ang ubang kwartahang politiko  nanguha dili lang kay usa kondili gatosan ka social media operators aron molihok para sa ilang online campaign.  Sa pagkakaron, wa pay komprehensibong pagtuon bahin sa panghunahuna sa mga Pilipinong netizens pagtimbang-timbang sa ilang nabasahan diha sa social media.

Apan makita nga daghang netizens ang magpataka lang og like, komento ug mopasa pa gyud bisan wala sila nakasabot o wala sila masayod kon bahin sa unsa ang posts nga ilang nadawat.

Kining mga social media operators matawag usab nga social media influencers kay nakaimpluwensya sila sa mga tawong makabasa sa ilang gipang-post.

Nasayod  silang way panahon ang mga netizens pagtan-aw kon tinuod o dili ang ilang gi-posts, nagpatuyang lang pud sila  pag-posts.

Usa kini sa rason nganong misanay ang fake news sa social media. Kay maayo kaayo pagkahimo bisan dili tinuod, motuo na lang sab ang mga netizens.

Busa angay nga magmatngon sa tanang mabasahan karon sa social media  kay makaimpluwensya kini sa paghimo nila og desisyon sa eleksyon.