EDITORYAL- Dahil trapik, tigil muna ang mga paghuhukay
LALONG lumalala ang trapik ngayon at wala nang magawa ang mga motorista kundi maghimutok o magmura sa mga namumuno. May mga alternate route na sinasabi ang Metro Manila Develoment Authority (MMDA) subalit trapik din dahil maraming pasaway na pinaparkingan ng sasakyan, ginagawang carwash area, basketbolan, at may mga tindahan. Hinahatak ng MMDA ang mga sasakyang nakaparada pero pagtalikod, meron na naman.
Ngayong papalapit na ang Pasko, tiyak lalo pang tatrapik. Lalong mararamdaman ang bigat ng trapiko. Magkakaroon na ng kaliwa’t kanang promo sale ang mga shopping malls. Tiyak lalo nang bibigat ang trapik sa EDSA sapagkat lahat nang malalaking mall ay narito.
Noong nakaraang linggo, pinakiusapan na ng MMDA ang mga mall na magbukas ng 11:00 ng umaga simula sa Nobyembre 5 hanggang Enero 14, 2019 para hindi makadagdag sa bigat ng trapiko. Pumayag naman ang mall operators. Karaniwang nagbubukas ng 10:00 ng umaga ang mga malalaking malls. Ayon sa MMDA, pumayag din ang mall operators na mag-a-assign sila ng mga sekyu na mangangasiwa sa traffic ng mga sasakyang papasok sa establisimento. Ito ay para hindi magkabuhul-buhol ang trapik na maaapektuhan ang daloy sa EDSA at iba pang kalsada sa Metro Manila.
Ang magiging problema na lamang kung sakali ay ang isinasagawang road works ng Department of Public Works and Highways (DPWH) na kung kailan nalalapit ang holiday season ay saka nagsasagawa ng road re-blocking lalo na sa EDSA. Dapat hinto muna ang pagre-repair sa mga pangunahing lansangan para naman walang pagbubuhol ng trapiko.
Madalas na nagsasagawa ng reblocking ang DPWH sa EDSA malapit sa GMA-7 na nagdudulot nang grabeng trapik. Noong nakaraang linggo, nagsagawa na naman sila ng reblocking at umano’y may susunod pa. Dapat tigil muna ang pagsasaayos dahil hindi pa naman talaga sira ang hinuhukay nila. Isa pa, tag-ulan ngayon kaya mahirap ang hukay nang hukay.
May mga ginagawa ring paghuhukay para sa drainages na nagiging dahilan din nang matinding trapik. Marami sa mga drainage project na sinimulan ay hindi pa natatapos gaya sa Earnshaw St. at sa Sta. Cruz, Manila area.
Dapat namang sumunod ang DPWH sa pakiusap na huwag munang maghukay o mag-repair kaya. Maaari namang ipagpaliban ang mga road repairs na ito.
- Latest
