Tanod dakpon

Husto gyud kaayo ang baruganan ni Cebu City police director Royina Garma nga pangdakpon ang mga tanod ug ubang peace volunteer nga masakpang magdala og armas nga walay lisensya ug permit.

Kon tugotan nimo nga ang usa ka tanod makadaladala og armas bisan og wala sila’y lisensya, abi kay mitabang sa pagpatunhay sa kahusay ug kalinaw sa barangay, nagpasabot diay nga sayon ra kaayo ang requirement sa paghupot og pusil?

Sa ato pa kon amigo ka sa mga opisyal sa barangay ug matudlo ka nga tanod, makahimo ka na diay sa pagdaladala og armas?

Kini ra ba gayud maoy sitwasyon karon, nga mga tanod nagluklok na og armas nga mura gyud og polis.

Nalipay ko nga ingon niini ang baruganan ni Garma diha nga akong gi-interview kaniadtong Huwebes, apan ambot og dili ba kaha naa lang kini sa tumoy sa iyang dila.

Bitaw, kamong mga tanod nakasabot ko nga angay gyud kamo nga dunay armas.

Apan nganong dili man kamo mokuha og License to Own and Possess Firearms (LTOPF) ug ang inyong armas nindot, iparehistro sa Firearms and Explosives Division (FED) sa Camp Crame aron legal ang pagdala ninyo sa pusil.

Ayaw mo pagtuo nga lisud kuhaon ang LTOPF, kay dali ra kaayo, ilabi na kon adunay “caravan” ang Camp Crame dinhi sa Sugbo.

Ako gani nga walay armas, mikuha man ko og LTOPF kay aron nga kon ganahan na ko nga mohupot og armas, dali na lang.

Alang sa mga wala masayod, ang tawo nga gustong mohupot og armas kinahanglang molukat og lisensya aron siya katugotan nga makapalit og makagunit og pusil.

Dili sama kaniadto nga ang armas ra man ang irehistro.

Apan dali na lang gyud kaayo karon ang paglukat og lisensya ug permit sa armas kay mahimo man nga anha na lang kini himoa sa internet pinaagi sa imong selpon. Gusto mo patudlo nako?

* * *

Pahimuslan nako ang pagpasalamat sa mga mitabang kanako aron magmalampuson ang pagpahigayon namo og buwag nga variety show ug singing contest sa among sitio kaniadtong Oktubre 5, ug Oktubre 11.

Kabahin kini sa piyesta sa Sitio Fatima, sakop sa Barangay Apas, dakbayan sa Sugbo.

Nidayeg gyud kaayo ko sa mga nitabang kay diha nako naila kon kinsa ang tinuod nga mga higala.

Dili na lang nako ibatbat pa ang ilang mga ngalan, apan nakaila na ko sa mga tinuod nga higala.

Dunay mga silingan nako nga bisan pobre, mihatag og ginagmay ra gyud tawon nga tabang.

May uban sab nga kusog kaayo magpagarbo nga sila kwartahan, apan hapit na lang dili motabang.